Аймгийн Байгаль орчны газар "Тэрбум мод" үндэсний хөдөлгөөний хүрээнд холбогдох байгууллагуудтай хамтран өнгөрсөн амралтын өдрөөр өргөн хүрээтэй мод тарих арга хэмжээ зохион байгуулж, нийт 1700 мод тарьжээ.
“Цэмцгэр ногоон хот” нэртэй эко парадад төрийн 40 гаруй байгууллагын албан хаагчид, 200 гаруй иргэн оролцсон бөгөөд Улаангом сумын 6 дугаар багийн нутагт орших цөлжилтөөс хамгаалах ойн зурваст мод тарьсан байна. Тус үйл ажиллагаа нь байгаль орчноо хамгаалах, ногоон ирээдүйг цогцлоох, олон нийтийн оролцоог нэмэгдүүлэх зорилготойгоор хэрэгжсэн төдийгүй аймгийн түүхт 100 жилийн ойг угтан бэлэг болгон хэрэгжүүлсэн ногоон бүтээн байгуулалтын нэг хэсэг боллоо.
Шинээр тарьсан модны арчилгаа, усалгааг Түргэн сум дахь сум дундын ойн анги хариуцан ажиллах бөгөөд тухайн талбай нь гүний худаг, усалгааны системтэй тул иргэд өөрсдийн санаачилгаар очиж мод тарих боломжтой нээлттэй бүс гэж Байгаль орчны газраас мэдээллээ.
Эх сурвалж: Увс аймгийн Байгаль орчны газар
