Канадын мэргэжлийн үйлчилгээний байгууллага (CESO)-ын суурин төлөөлөгч хатагтай Женифер Адамс төслийн монгол ажилтнуудын хамт энэ сарын 8-нд Архангай аймагт ажиллаж, аймгийн ИТХ-ын дарга П.Гомбодорж болон ЗДТГ-ын Төрийн захиргаа, удирдлагын хэлтсийн дарга Ш.Гомбодорж нартай уулзлаа.

Уулзалтаар Канад Улсын Засгийн газрын санхүүжилтээр 2024 оны дөрөвдүгээр сараас хэрэгжиж эхэлсэн таван жилийн хугацаатай “Канад-Монголын Мерит” төслийн талаар танилцууллаа. Тус төслийн нэг хэсгийг 2.5 жилийн хугацаанд Архангай аймагт хэрэгжүүлэхээр төлөвлөсөн бөгөөд зорилго нь иргэдэд төрийн үйлчилгээг цахимаар хүргэх чадамж, хүртээмжийг нэмэгдүүлэх, төрийн албан хаагчдын цахим орчны мэдлэг, ур чадварыг дээшлүүлэхэд чиглэж байгаа юм.

Аймгийн ИТХ-ын дарга П.Гомбодорж уулзалтын үеэр, “Төсөл хэрэгжих явцад алслагдсан сум, багуудад дэд бүтцийн нөхцөлийг сайжруулах шаардлагатай. Мөн төрийн албан хаагчдыг үе шаттайгаар чадавхжуулах нь хамгийн түрүүнд анхаарах асуудал” хэмээгээд, аймгийн зүгээс бүрэн дэмжиж, хамтран ажиллахаа илэрхийлсэн байна.

Архангай аймагт хэрэгжих энэхүү төсөл нь төрийн үйлчилгээний хүртээмж, цахим шилжилт, хүний нөөцийн чадавхыг сайжруулах замаар орон нутгийн засаглал, иргэдийн амьдралын чанарт бодитой ахиц гаргах зорилготой гэж төслийн баг тодотголоо.

Эх сурвалж: Архангай аймгийн ЗДТГ, CESO