БНХАУ-ын Шанхай хотноо зохион байгуулагдаж буй Шанхайн хамтын ажиллагааны байгууллагын гишүүн орнуудын хил орчмын бүс нутгийн Онцгой байдлын удирдлагын хилийн хамтын ажиллагаа, мэдээлэл солилцох механизм бий болгох чуулга уулзалтад Монгол Улсаас Онцгой байдлын ерөнхий газрын Ажиллагааны удирдлагын газрын хэлтсийн дарга, хурандаа Б.Мягмардорж, Гал түймэртэй тэмцэх газрын мэргэжилтэн, дэслэгч Б.Ариунбат нар оролцож байна.
Чуулга уулзалтын үеэр Монгол Улсын хил орчмын бүс нутгийн гамшгийн нөхцөл байдлын талаарх мэдээллийг төлөөлөгчдөд танилцуулж, хилийн хамтын ажиллагааг сайжруулах, гамшгаас урьдчилан сэргийлэх, гамшгийн үед хамтран ажиллах боломжуудын талаар санал солилцсон байна.
Энэхүү уулзалтад ШХАБ-ын гишүүн болон ажиглагч орнуудын 9 улсын 30 гаруй төлөөлөгч оролцож байгаа бөгөөд энэ сарын 14-нийг хүртэл үргэлжлэх юм. Хөтөлбөрийн хүрээнд төлөөлөгчид БНХАУ-ын Шанхай хотын Гал түймэр унтраах-аврах ангийн үйл ажиллагаатай танилцаж, олон улсын аврах ажиллагааны үзэсгэлэнд оролцож байна.
Чуулга уулзалт нь хил дамнасан гамшгийн эрсдэлийг бууруулах, мэдээ, мэдээллийн шуурхай солилцоог хангах, хамтын ажиллагааг бэхжүүлэх чухал ач холбогдолтой гэж үзэж байна.
Эх сурвалж: Онцгой байдлын ерөнхий газар
