Гэр бүл, хөдөлмөр, нийгмийн хамгааллын сайд Л.Энх-Амгалан Дорноговь аймагт ажиллах үеэрээ тус аймгийн Хүүхэд гэр бүлийн хөгжил, хамгааллын газрын үйл ажиллагаатай танилцав. Тус газар 40 ажилтан, албан хаагчийн бүрэлдэхүүнтэйгээр гэр бүл, хүүхдийн хөгжил хамгааллын чиглэлээр аймаг орон нутагтаа үйл ажиллагаа явуулж байна.

Тус газрын тайланд дурдсанаар 2018-2025 онд Замын-Үүд сумын түр хамгаалах байраар 24 насанд хүрэгч, 93 хүүхэд, Сайншанд сумын түр хамгаалах байраар 12 насанд хүрэгч, 97 хүүхдэд хамгаалах үйлчилгээ үзүүлжээ. Цаашид Хүүхэд хамгааллын тухай хуулийн хүрээнд 2025 оны нэгдүгээр сарын нэгнээс эхлэн сум, хороо бүрд хүүхэд, гэр бүлийн нийгмийн ажилтан ажиллах эрх зүйн орчин бүрдэж байгаа юм.

Дорноговь аймгийн хэмжээнд 14 сум байдаг бөгөөд эдгээр сумд бүгдэд нь нийгмийн ажилтан томилогдон ажиллаж эхэлсэн талаар Хүүхэд гэр бүлийн хөгжил, хамгааллын газрын дарга Ш.Алимаа мэдээллээ. Нийгмийн ажилтнуудын оролцоогоор хүүхдүүдийн санал бодлыг шууд төрд хүргэх, газар дээр нь тулгамдсан асуудлыг шийдвэрлэх, хүүхдүүдийн төлөө дуу хоолой болж ажиллах боломж бүрдэж байгаа нь энэ ажлын чухал үр дүн болж байна.

Гэвч тус салбарт шийдвэрлэх шаардлагатай хэд хэдэн асуудал байгааг албаныхан онцоллоо. Хүний нөөцийн бүтэц, орон тоонд өөрчлөлт орсон хэдий ч албан тушаалын тодорхойлолт батлагдаагүй, бодлогын мэргэжилтнүүдийн орон тоо дутмаг байгаа нь үйл ажиллагаанд хүндрэл үүсгэж байгааг дурдсан юм. Мөн байгууллага нь түрээсийн байранд үйл ажиллагаа явуулж, хүүхэд хамгааллын чиглэлээр түргэн шуурхай ажиллах автомашингүй, сум, баг бүрд шинээр ажиллаж буй нийгмийн ажилтнуудыг техник, тоног төхөөрөмжөөр хангах шаардлагатай байгааг ажилтнууд сануулжээ.

Аймгийн Хүүхэд гэр бүлийн хөгжил, хамгааллын газар хоёр жил тутамд “Хүүхдийн чуулган” зохион байгуулж, 14 сум тус бүрд “Хүүхдийн элч” томилон ажиллуулдаг уламжлал тогтоосон нь хүүхдийн эрх ашгийг хамгаалах, тэдний санал санаачилгыг төрийн бодлогод тусгуулах сайн жишиг болжээ.

Хүүхэд хамгааллын ажлын зэрэгцээ хүүхдийн хөгжлийг хангах, салбар дундын уялдаа холбоог сайжруулах, орон нутагт гэр бүл, нийгмийн хамгааллын үйл ажиллагааг илүү үр нөлөөтэй болгох шаардлагатайг салбарын сайд онцлон тэмдэглэлээ.

Эх сурвалж: Гэр бүл, хөдөлмөр, нийгмийн хамгааллын яам