Тэрбум мод тарих үндэсний хөдөлгөөний хүрээнд Дундговь аймгийн Хүүхдийн паркад “Ирээдүйгээ ургуулъя” ногоон төгөл байгуулах үйл ажиллагаа зохион байгуулагдлаа. Энэ үеэр хүүхдийн зөвлөлийн гишүүн 10 байгууллагын албан хаагчид хамтран 500 ширхэг мод тарьсан байна.

Энэ жил Монгол Улсад хүүхдийн байгууллага үүсэж хөгжсөний 100 жилийн ой тохиож байгаа бөгөөд тус ойн хүрээнд ирээдүй болсон бяцхан хүүхдүүддээ зориулан энэхүү мод тарих үйл ажиллагааг өрнүүлсэн нь онцлог байлаа.

Дундговь аймаг “Тэрбум мод” үндэсний хөдөлгөөний хүрээнд нийт 30 сая мод тарих гэрээ байгуулсан бөгөөд 2021 оноос хойш 688,304 мод тарьсан байна. Харин 2025 онд 180,000 мод тарихаар төлөвлөж, энэ зорилтын хүрээнд бүх нийтийн мод тарих өдрийг Сайнцагаан сумын Арвижих төгөлд зохион байгуулж, төрийн байгууллагын албан хаагчид 700 ширхэг мод тарьжээ.

Мод тарих үйл ажиллагаанд аймгийн Засаг дарга С.Мөнхчулуун, ЗДТГ-ын дарга Б.Лхагвабаатар, Засаг даргын зөвлөх П.Бүрэнжаргал, Байгаль орчны газрын дарга Н.Гантулга, Хүүхэд, гэр бүлийн хөгжил хамгааллын газрын дарга С.Ууганбаяр нар оролцож, байгууллага бүр 50, өрх бүр 5 ширхэг мод тарихыг уриалсан байна.

Энэхүү үйл ажиллагаа нь хүүхдийн хүмүүжил, байгаль орчны боловсролд хувь нэмэр оруулж, ногоон байгууламжийг нэмэгдүүлэхэд чухал ач холбогдолтой юм.