Ерөнхий сайд Л.Оюун-Эрдэнэ говийн бүсийн зөвлөлийн анхдугаар хуралд оролцохоор Дорноговь аймгийн Сайншанд суманд явах замдаа барилгын материалын үйлдвэрлэл болон сэргээгдэх эрчим хүчний томоохон төслүүдтэй газар дээр нь очиж танилцлаа. Тэрбээр дотоодын үйлдвэрлэлийг дэмжих, импортыг орлох бүтээгдэхүүн үйлдвэрлэл, барилгын материалын үйлдвэрлэлийг цогцоор нь хөгжүүлэх Засгийн газрын бодлогын хүрээнд хэрэгжүүлж буй “МАК” ХХК-ийн үйл ажиллагааг онцлон үзэж, дэмжиж ажиллахаа илэрхийллээ.

Төв аймгийн Сэргэлэн, Дорноговь аймгийн Даланжаргалан суманд “МАК” ХХК барилгын материалын иж бүрэн цогцолбор байгуулж, евро стандартын цемент, шохой, хаалга, цонх, дүүргэлтийн блок, фасад, шилэн хийц, агааржуулах ган хоолойн бүрэн автомат үйлдвэрүүдийг ашиглалтад оруулаад байна. Мөн тус компанийн хэрэгжүүлж буй “Даланжаргалан нарны цахилгаан станц”-ын үйл ажиллагаатай танилцсан юм.

Цаашид “МАК” компани гантиг болон инженерчилсэн чулуун хавтан, керамик хавтан, файбер цементэн хавтан, хуванцраар шуудай үйлдвэрлэх, бетон хийц, шил ганжуулах зэрэг шинэ үйлдвэрүүдийг байгуулж, ашиглалтад оруулахаар төлөвлөжээ. Энэ төслүүд бүрэн хэрэгжсэнээр Даланжаргалангийн цогцолбор төсөлд хоёр мянга, Сэргэлэнгийн төсөлд нэг мянган ажлын байр шинээр бий болно.

Мөн Монгол Улсад анх удаа үйлдвэр, уурхайн цахилгаан эрчим хүчний хэрэгцээг өөрийн эх үүсвэрээр хангах зорилгоор Сэргэлэн, Даланжаргалан, Хөөт гэсэн гурван байршилд нийт 40 МВт-ын хүчин чадалтай нарны цахилгаан станц, 90 МВт-ын цэнэг хураагуурыг ашиглалтад оруулжээ. Энэ нь зүүн хойд Азийн хэмжээнд аж үйлдвэрийн компанийн хэрэгжүүлсэн хамгийн том нарны цахилгаан станцын төсөлд тооцогдож байна.

Ирээдүйд сэргээгдэх эрчим хүчний төслүүдийг Дорноговь, Баянхонгор аймагт, устөрөгчийн үйлдвэрлэл, дагалдах бүтээгдэхүүн боловсруулах төслийг Дорнод аймгийн Адуунчулууны уурхайг түшиглэн хэрэгжүүлэхээр төлөвлөж буйг Ерөнхий сайд онцолсон юм.

Засгийн газрын үйл ажиллагааны хөтөлбөрт барилгын салбарыг хувийн хэвшилтэй хамтран хөгжүүлэх бодлого тусгагдсан бөгөөд энэ хүрээнд барилгын материал, түүхий эдийн тасралтгүй нийлүүлэлтийг хангах, төр, хувийн хэвшлийн хамтын ажиллагааг эрчимжүүлэх чиглэлээр холбогдох албан тушаалтнуудад үүрэг өглөө.

Маргааш Засгийн газар бүрэн бүрэлдэхүүнээрээ Дорноговь аймгийн Сайншанд суманд хуралдах юм.

Эх сурвалж: Засгийн газрын Хэвлэл мэдээллийн алба