Улсын Их Хурлын даргын 2025 оны тавдугаар сарын 8-ны өдрийн захирамжаар Тодорхой ордыг стратегийн ач холбогдол бүхий ашигт малтмалын ордод хамааруулах тухай УИХ-ын 2007 оны 27 дугаар тогтоолын дөрөв дэх заалтын хэрэгжилттэй танилцаж, санал дүгнэлт гаргах үүрэг бүхий ажлын хэсгийг байгуулжээ. Энэхүү ажлын хэсэг өнөөдөр хэвлэлийн бага хурал хийж, сэтгүүлчдэд мэдээлэл өглөө.

УИХ-ын гишүүн, ажлын хэсгийн ахлагч П.Мөнхтулгын танилцуулснаар, ажлын хэсэг мэргэжлийн байгууллага, албан тушаалтнууд болон холбогдох экспертүүдийг оролцуулан мэдээлэл, судалгаа гаргуулж, дүн шинжилгээ хийх ажлыг зохион байгуулах юм. Мөн санал, дүгнэлт гаргаж, цаашид авах арга хэмжээний талаарх санал, шийдвэрийн төслийг боловсруулан УИХ-ын 2025 оны намрын ээлжит чуулганаар танилцуулах үүрэг хүлээжээ.

Хууль зүй, дотоод хэргийн сайд О.Алтангэрэл хэлэхдээ, өнгөрсөн 18 жилийн хугацаанд Ухаа худаг, Оюу толгой, Таван толгой, Цагаан суварга, Асгат зэрэг стратегийн ач холбогдол бүхий орд газруудаас ард түмэн бодит үр өгөөж хүртээгүй асуудлыг хөндөн, энэ удаагийн ажлын хэсгийн байгуулагдсан нь түүхэн шийдвэр болж байгааг онцлов. Мөн өмнөх Засгийн газрын байгуулсан ажлын хэсэг урьдчилсан байдлаар дүгнэлт гарган, УИХ-ын тогтоолын төслийг боловсруулсан ч шаардлага хангаагүй гэж үзэн буцаагдсан талаар мэдээлэл өглөө.

УИХ-ын Ерөнхий нарийн бичгийн дарга Б.Баасандорж тогтоолын төслийн талаар танилцуулахдаа, Хууль тогтоомжийн тухай хуульд заасан шаардлагыг хангаагүй тул УИХ-ын Тамгын газраас хууль зүйн дүгнэлт гаргаж, бүрдлийг буцаасан гэв. Мөн Оюу толгой, Цагаан суварга ордуудын төрийн эзэмшлийн хувь хэмжээг тогтоосон тогтоол батлагдсан хэдий ч Таван толгой, Асгатын орд газартай холбоотой тогтоолын заалтууд өнөөдрийг хүртэл хэрэгжээгүй хэвээр байгааг онцолсон юм.

Тиймээс Засгийн газар 2007 оны 27 дугаар тогтоолын хэрэгжилтийг хангаж, төрийн эзэмшлийн хувь хэмжээг тодорхой болгох саналыг тусган, шаардлагатай шийдвэрийг гаргах нь зүйтэй гэж үзэж байгааг УИХ-ын Хэвлэл мэдээллийн газар мэдээллээ.

Эх сурвалж: УИХ-ын Хэвлэл мэдээллийн газар