Харилцаа холбооны зохицуулах хорооноос өргөн нэвтрүүлгийн салбарын хөгжлийн чиг хандлага, технологийн дэвшил, бүтээл үйлдвэрлэл, олон улсын хамтын ажиллагааг хэлэлцэх “Өргөн нэвтрүүлгийн хөгжил-2025” форумыг зохион байгууллаа. Уг арга хэмжээ нь салбарын хөгжилд тулгамдаж буй асуудлуудыг хэлэлцэж, ирээдүйн боломж, шийдлийг тодорхойлох зорилготой болсон байна.

Форумын үеэр өргөн нэвтрүүлгийн салбарын өөрчлөлт, шинэчлэл, хөгжлийн талаар оролцогчид туршлага солилцож, техник технологийн дэвшил, дамжуулах орчны шинэчлэл, олон улсын хамтын ажиллагаа, хамтарсан бүтээл үйлдвэрлэлийн талаар өргөн хүрээнд хэлэлцүүлэг өрнүүлэв. Мөн гадаад, дотоодын контент, бүтээл үйлдвэрлэгчид үйл ажиллагаагаа танилцуулж, хамтын ажиллагааны санал тавин, цаашид харилцан ажиллагаагаа өргөжүүлэх боломжийг эрэлхийлжээ.

Энэхүү форум нь оролцогчдод шинэ технологи, контент бүтээлийн чиг хандлагаар харилцан туршлага хуваалцах, олон улсын түвшинд хамтын ажиллагаагаа өргөжүүлэх, үйл ажиллагааны цар хүрээгээ тэлэх боломжийг олгосноороо онцлог болсон юм.

Харилцаа холбооны зохицуулах хорооны 30 жилийн ойг тохиолдуулан зохион байгуулсан энэхүү арга хэмжээнд дотоод, гадаадын телевизүүд, контент бүтээгчид, олон сувгийн дамжуулах үйлчилгээ эрхлэгчид, үйлчилгээ эрхлэгчдийн холбоо болон салбарын бодлого боловсруулагч, зохицуулагч, нийт 100 гаруй зочин, төлөөлөгч оролцсон байна.

Эх сурвалж: Харилцаа холбооны зохицуулах хороо