Авлигатай тэмцэх газрын албан хаагчид Үндэсний хөгжлийн бодлого, төлөвлөлтийн хүрээнд хэрэгжиж буй бүтээн байгуулалтын ажлуудын төсөв, санхүү, зарцуулалт, гүйцэтгэлийн ил тод байдлыг сайжруулах зорилгоор мэдээлэл, арга зүйн уулзалт зохион байгууллаа.

Уулзалтад Эдийн засаг, хөгжлийн яам болон Авлигатай тэмцэх газрын удирдлагууд, хэлтсийн дарга нар оролцож, 2024-2028 онд Засгийн газраас хэрэгжүүлж буй 14 мега төслийн хэрэгжилт, санхүүжилтийн төлөвлөлт, хяналт, тайлагналын талаар хэлэлцсэн байна. Тухайлбал, төслүүдийг хугацаанд нь, төлөвлөсөн төсөвт өртгийн хүрээнд, чанартай хэрэгжүүлэхэд чиглэсэн зохион байгуулалт, хяналтын механизмыг боловсронгуй болгох шаардлагыг онцолжээ. Мөн авлигын гэмт хэрэг, ашиг сонирхлын зөрчлийг үүсгэхгүй байхад анхаарах, олон нийтэд үнэн зөв мэдээлэл хүргэх чиглэлээр зөвлөгөө өгсөн байна.

Уулзалтын үеэр Нийтийн мэдээллийн ил тод байдлын тухай хуулийн 8 дугаар зүйлийн 8.1-д заасан “төрийн үйл ажиллагааг ил тод, нээлттэй байлгах” үүргийн хэрэгжилтийг хангах, мэдээлэл хариуцагч байгууллагуудын үйл ажиллагааны стратеги, төсөв, санхүү, худалдан авалт зэрэг мэдээллийг олон нийтэд ил тод болгох зарчмыг мөрдөх нь чухлыг онцлон хэлэлцлээ.

Эх сурвалж: Авлигатай тэмцэх газар