Баянхонгор аймгийн Иргэдийн Төлөөлөгчдийн Хурлын даргын 2025 оны тавдугаар сарын 1-ний өдрийн захирамжаар ашигт малтмалын олборлолт, гэрээний хэрэгжилт, үр дүнг хянан хэлэлцэх ерөнхий хяналтын сонсголыг ирэх зургадугаар сарын 16-ны өдөр Баянхонгор суманд зохион байгуулахаар болжээ.

Энэхүү сонсгол нь тус аймагт олгосон ашигт малтмалын тусгай зөвшөөрлүүдийн хэрэгжилтийг олон нийтийн оролцоотойгоор дүгнэх, салбарын үйл ажиллагаанд ил тод, хариуцлагатай бодлого баримтлахад чиглэсэн онцлог үйл ажиллагаа байх юм.

Сонсголын бэлтгэл ажлын хүрээнд тавдугаар сарын 22-24-ний өдрүүдэд урьдчилсан хэлэлцүүлгүүдийг “Нутгийн захиргааны ордон”-ы хурлын танхимд зохион байгуулна. Тус хэлэлцүүлгүүдэд иргэд, төрийн бус байгууллага, хувийн хэвшлийн төлөөлөл оролцож, ашигт малтмалын салбарын бодлого, хэрэгжилттэй холбоотой санал бодлоо чөлөөтэй илэрхийлэх боломжтой.

Баянхонгор аймгийн нийт нутаг дэвсгэр 11.5 сая га талбайтай бөгөөд үүний 3.45 хувийг буюу 382.6 мянган га-г ашигт малтмалын тусгай зөвшөөрлийн талбай эзэлж байна. Аймгийн хэмжээнд өнөөдрийн байдлаар 100 ашиглалтын болон 39 хайгуулын тусгай зөвшөөрөлтэй аж ахуйн нэгж бүртгэлтэй байгаа юм.

Эх сурвалж: Баянхонгор аймгийн ИТХ