Сонгуулийн Ерөнхий Хорооны 2025 оны тавдугаар сарын 7-ны өдрийн хуралдаанаар Улсын Их Хурлын 2024 оны ээлжит сонгуулийн үр дүнд нэг ба түүнээс дээш хувийн санал авсан улс төрийн нам, эвсэлд төрөөс олгох санхүүжилтийн хэмжээг эцэслэн тогтоож шийдвэрлэлээ.
Улс төрийн намын тухай хуулийн дагуу жил бүрийн есдүгээр сарын 15-ны дотор төрийн санхүүжилтийн хэмжээг тогтоож, нам, эвсэл бүрийн санхүүгийн тайланг хянасны үндсэн дээр тухайн оны санхүүжилтийг батлах журам үйлчилдэг. Энэ хүрээнд нийт 28 нам санхүүгийн тайлангаа хуульд заасан хугацаанд ирүүлсэн бөгөөд тэдгээрийг аудитын байгууллагууд болон Үндэсний аудитын газар хамтран хянажээ.
Хяналтын үр дүнгээр:
-
Монгол Ардын нам, Ардчилсан нам, ХҮН нам, Иргэний зориг ногоон нам, Шинэ нэгдсэн эвсэл зэрэг намуудад төрийн санхүүжилтийн дээд хэмжээгээр санхүүжилт олгохоор шийдвэрлэв.
-
Үндэсний эвсэл орлогын нийлбэр нь дээд хязгаарт хүрээгүй тул буурсан хэмжээгээр санхүүжилт авна.
-
Үнэн ба зөв нам 2024 онд хуулиар зөвшөөрөгдсөн орлогын эх үүсвэргүй байсан тул санхүүжилт аваагүй. Мөн намын дарга А.Отгонбаатар төрийн санхүүжилтээс татгалзах бичгийг дөрөвдүгээр сарын 29-нд ирүүлсэн байна.
Санхүүжилт нь дараах үндэслэлээр олгогдож буй:
-
Нийт сонгогчдын 1 ба түүнээс дээш хувийн санал авсан байх.
-
Эмэгтэй болон хөгжлийн бэрхшээлтэй нэр дэвшигчдийн тоо хүйсийн тэнцвэрт байдлыг давсан тохиолдолд нэг удаагийн урамшуулалтай.
-
Санхүүжилтийн хэмжээ нь тухайн намын нийт орлогын хоёр дахин ихээс хэтрэхгүй байх хязгаартай.
Сонгуулийн Ерөнхий Хорооны мэдээлснээр төрөөс олгож буй энэхүү санхүүжилт нь зөвхөн үйл ажиллагаа явуулах үндэс бус, ардчиллын боловсрол, дотоод ардчиллыг бэхжүүлэхэд чиглэсэн бодлогын шаардлагыг хангасан байх ёстой. Зарцуулалтад 3 шатлалт хяналт хэрэгжүүлнэ. Ил тод тайлагнаагүй, зориулалтын бусаар ашигласан тохиолдолд санхүүжилт зогсох, улмаар намыг идэвхгүйд тооцох хүртэл арга хэмжээ авах хуульчилгаа үйлчилж байна.
Сонгуулийн Ерөнхий Хорооноос намуудад хуулийн хэрэгжилтийн талаар мэргэжил, арга зүйн зөвлөмж өгч ажиллахыг холбогдох газарт даалгасан байна.
Эх сурвалж: Сонгуулийн Ерөнхий Хороо
