Монгол Улсын Ерөнхийлөгч Ухнаагийн Хүрэлсүх Оросын Ерөнхийлөгч Владимир Путины урилгаар 2025 оны тавдугаар сарын 9-ний өдөр болох Аугаа их Эх орны дайны ялалтын 80 жилийн ойн баярт оролцохоор ОХУ-ын нийслэл Москва хотноо хүрэлцэн ирээд байна.

Ерөнхийлөгч У.Хүрэлсүх болон түүнийг дагалдан яваа албан ёсны төлөөлөгчдийг Москвагийн “Внуково” олон улсын нисэх онгоцны буудалд хүрэлцэн ирэхэд Оросын талаас Төрийн хүндэт харуул жагсаж, Гадаад хэргийн орлогч сайд А.Ю.Руденко, Төрийн ёслолын газрын захирал И.В.Богдашев болон Монгол Улсаас ОХУ-д суугаа Элчин сайд Ө.Энхтүвшин нар угтан авсан юм.

Ерөнхийлөгч У.Хүрэлсүх өнөөдөр Ерөнхийлөгч В.В.Путинтай албан ёсны уулзалт хийж, хоёр орны харилцаа, хамтын ажиллагааны талаар санал солилцох төлөвтэй байна. Харин тавдугаар сарын 9-ний өдөр Улаан талбайд болох Ялалтын баярын цэргийн ёслолд гадаадын олон улсын удирдагчдын хамт оролцож, Александровын цэцэрлэгт байрлах “Нэр нь үл мэдэгдэх цэргийн хөшөө”-нд хүндэтгэл үзүүлэн цэцэг өргөх юм.

Мөн Ерөнхийлөгч Москва хотын Хүндэтгэлийн дэнж дэх Ялалтын цэцэрлэгт хүрээлэнд сүндэрлэсэн “Ялалтад тэмүүлсэн морьд” хөшөөнд цэцэг өргөж, БНМАУ-ын баатар болон Хөдөлмөрийн баатар цол хүртсэн ОХУ, ЗХУ-ын иргэдийн төлөөлөлтэй уулзахаар төлөвлөсөн байна.

Түүнчлэн Ялалтын 80 жилийн ойн жагсаалд Монгол Улсын Зэвсэгт хүчний бие бүрэлдэхүүн оролцож, хоёр орны түүхэн холбоо, найрсаг харилцааг бэлгэдэн алхах юм. Монгол Улс өмнө нь 1995, 2005, 2010, 2015 онуудад төрийн тэргүүний түвшинд тус арга хэмжээнд оролцож байсан бол, Зэвсэгт хүчний салбарынхан 70, 75 жилийн ойн баярын жагсаалд ч мөн оролцож байсан уламжлалтай.

Эх сурвалж: Монгол Улсын Ерөнхийлөгчийн Тамгын газар