2025 оны тавдугаар сарын 6-ны өдөр Төрийн ордонд болсон Төрийн хэмнэлт, бүтээмжийн зөвлөлийн ээлжит хуралдаанаар төсвийн хэмнэлт, төрийн үйлчилгээний үр ашиг, бүтээмжийг нэмэгдүүлэх талаар хэлэлцлээ. Хурлын эхэнд Сангийн яамны Төсвийн бодлого, төлөвлөлтийн газрын дарга М.Санжаадорж “Төрийн хэмнэлтийн талаар авах арга хэмжээний санал”-ыг танилцуулсан байна.
Тэрбээр нэгдсэн төсвийн тэнцлийг алдагдалгүй төлөвлөж, хувийн хэвшлийг дэмжих замаар төрийн бүтээмжийг нэмэгдүүлэх, төрийн хэвийн үйл ажиллагааг алдагдуулахгүйгээр хэмнэлт бий болгох, төрийн үйлчилгээний чанар, хүртээмжийг сайжруулахад чиглэсэн арга замуудыг танилцуулсан юм. Мөн хяналтыг санхүүжилттэй уялдуулах боломжийн талаар санал дэвшүүлжээ.
Хурлын үеэр зөвлөлийн гишүүд дараах санаачилгуудыг хэлэлцэв:
-
Төсвийн сахилга батыг бэхжүүлж, урсгал зардлыг хянах
-
Төрийн үйлчилгээнд цахим шилжилт, хиймэл оюун ухааныг нэвтрүүлэх
-
Хувийн хэвшилтэй хамтарсан дэд ажлын хэсгүүд байгуулах
-
Бүтээмжийн асуудлыг үндэсний хэмжээнд авч үзэж, аян өрнүүлэх
-
Албан хаагчдын ажлын үр дүнг үнэлэх тогтолцоог боловсронгуй болгох
-
Сайн жишээ болсон байгууллагуудыг урамшуулах, туршлага хуваалцах систем бий болгох
Зөвлөлийн дарга бөгөөд Монгол Улсын сайд, Засгийн газрын Хэрэг эрхлэх газрын дарга Н.Учрал эдгээр саналыг “Санхүүгийн сахилга бат”, “Процессын ре-инженеринг”, “Цахим шилжилт, хиймэл оюун” гэсэн гурван үндсэн чиглэлд ангилж, төр-хувийн хэвшлийн хамтарсан дэд ажлын хэсгүүд байгуулан ажиллуулах чиглэл өглөө. Эдгээр ажлыг 2026 оны Төсвийн тухай хуультай уялдуулан үр дүнтэй хэрэгжүүлж, УИХ болон Засгийн газарт танилцуулахыг үүрэг болгосон байна.
Эх сурвалж: Төрийн хэмнэлт, бүтээмжийн зөвлөл
