Монгол Улс, Исламын Бүгд Найрамдах Иран Улсын Гадаад харилцааны яам хоорондын хоёр дахь зөвлөлдөх уулзалт 2025 оны тавдугаар сарын 5-ны өдөр Техран хотод амжилттай зохион байгуулагдлаа. Уулзалтыг Монголын талаас Гадаад харилцааны яамны Төрийн нарийн бичгийн дарга Л.Мөнхтүшиг, Ираны талаас Гадаад хэргийн туслах сайд, Зүүн Ази, Далайн орнуудын газрын Ерөнхий захирал Али Асгхар Мохаммеди нар ахалсан байна.
Хоёр тал түүхэн уламжлалтай найрсаг харилцаа тогтвортой хөгжиж ирснийг онцолж, харилцаа хамтын ажиллагааг цаашид өргөжүүлэн хөгжүүлэх олон асуудлаар санал солилцов. Сүүлийн жилүүдэд худалдааны эргэлт нэмэгдэж буйг онцолж, Монгол Улсаас “Халал” аргаар боловсруулсан мах, махан бүтээгдэхүүний Иран руу чиглэсэн экспортын хэмжээг нэмэгдүүлэх сонирхлоо илэрхийллээ.
Түүнчлэн 2014 оноос хойш хэрэгжиж буй Ил Хаант Улсын түүх, соёлыг хамтран судлах ажлыг үргэлжлүүлэхийн зэрэгцээ хоёр орны иргэдийн харилцан ойлголцлыг гүнзгийрүүлэх, түүх, соёлын дурсгалт болон биет бус өвийг хамгаалах чиглэлээр хамтын ажиллагааг идэвхжүүлэх шаардлагатайг талууд санал нэгтэй тэмдэглэв.
Зөвлөлдөх уулзалтын үеэр Төрийн нарийн бичгийн дарга Л.Мөнхтүшиг Ираны Эдийн засгийн асуудал хариуцсан Гадаад хэргийн дэд сайд Сайед Расоол Мохажер болон Ираны Үндэсний музейн удирдлагуудтай тус тус уулзалт хийжээ.
Монгол, Иран хоёр улс 1971 оны тавдугаар сарын 20-нд дипломат харилцаа тогтоосон бөгөөд 2026 онд хоёр орны харилцааны 55 жилийн ой тохиох юм.
Эх сурвалж: Гадаад харилцааны яам
