Маргааш буюу лхагва гаригт Төсвийн байнгын хороо Монгол Улсын Ерөнхий аудиторын албан тушаалд нэр дэвшигчийн сонсгол, ерөнхий аудиторын албан тушаалд нэр дэвшигчийн сонсголын тайланг хаалттай хэлэлцэх тов гарсан. Товчхондоо Улсын ерөнхий аудитор Д.Загджавыг албан тушаалаас нь чөлөөлөхөөр болоод байгаа.

Д.Загджав нь 2024 оны тавдугаар сарын 30-наас ерөнхий аудитороор ажиллаж эхэлсэн боловч түүнийг хугацаанаас нь өмнө чөлөөлж, оронд С.Магнайсүрэнг томилуулахаар нэр дэвшүүлсэн. Асуудлыг пүрэв гаригт хуралдах чуулганы нэгдсэн хуралдаанаар шийдвэрлэнэ.

Үндэсний аудитын газар нь УИХ-д ажлаа тайлагнадаг, удирдлагыг нь УИХ-ын дарга нэр дэвшүүлэн томилуулдаг. Энэ дагуу УИХ-ын дарга Д.Амарбаясгалан Д.Загджавын албан тушаалаас нь чөлөөлөх, оронд нь С.Магнайсүрэнг томилуулахаар нэр дэвшүүлээд байна. Ерөнхий аудиторт нэр дэвшигч С.Магнайсүрэнгийн товч намтрыг танилцуулъя.

Боловсрол:

• 1993 онд Говь-Алтай аймгийн 10 жилийн 1-р сургууль
• 1997 онд МУИС-ийн ХЗДС /эрх зүйч, бакалавр/
• 1999 онд МУИС-ийн ХЗДС /эрх зүйч, магистр/

Ажилласан байдал:

• 1997-1999 онд “Улаанбаатар-Эрдэм” дээд сургуульд багш, тэнхимийн эрхлэгч,
• 1999-2000 онд УИХ-ын Тамгын газарт УИХ-ын гишүүний туслах,
• 2000-2005 онд УИХ-ын Тамгын газарт зөвлөх,
• 2005-2006 онд СБД-ийн ЗДТГ-т Тамгын газрын дарга,
• 2006-2007 онд ХХААЯ-нд сайдын зөвлөх,
• 2007-2008 онд Сангийн яаманд газрын дарга,
• 2008-2013 онд УИХ-ын Тамгын газарт нарийн бичгийн дарга,
• 2015 оны хоёрдугаар сараас Хөдөлмөрийн яамны төрийн нарийн бичгийн дарга,
• 2015 оны аравдугаар сараас Барилга, хот байгуулалтын яамны төрийн нарийн бичгийн дарга,
• 2023 оны есдүгээр сараас 2024 оны есдүгээр сар хүртэл Уул уурхай, хүнд үйлдвэрийн яам одоогийн Аж үйлдвэр, эрдэс баялгийн яамны оөрийн нарийн бичгийн даргаар ажилласан.

Төрийн аудитын тухай хууль

28.2.Монгол Улсын Ерөнхий аудиторын албан тушаалд нэр дэвшсэн хүн Төрийн албаны тухай хуульд заасан нийтлэг шаардлагаас гадна дараах шаардлагыг хангасан байна:

28.2.1. 45 нас хүрсэн байх;

28.2.2.эдийн засаг, санхүү, эсхүл хууль зүйн чиглэлээр дээд боловсролын зэрэгтэй байх;

28.2.3.төрийн албаны эрхэлсэн түшмэлээс дээш ангиллын албан тушаалд 10-аас доошгүй жил ажилласан байх;

28.2.4.сүүлийн зургаан жилийн хугацаанд улс төрийн намын гишүүнчлэлгүй, улс төрийн идэвхтэй үйл ажиллагаа явуулаагүй байх;

28.2.5.Монгол Улсын Ерөнхий аудиторын бүрэн эрхэд харшлах ажил, албан тушаал давхар эрхэлдэггүй, өмчийн бүх хэлбэрийн аж ахуйн нэгж, мэргэжлийн болон төрийн бус байгууллагад ашиг сонирхлын зөрчилгүй байх.