Улсын Их Хурлын Төрийн байгуулалтын байнгын хорооны 2025 оны тавдугаар сарын 5-ны хуралдаанаар Төрийн албаны зөвлөлийн 2024 оны үйл ажиллагааны тайланг хэлэлцэв. Тайланг Төрийн албаны зөвлөлийн дарга Л.Цэдэвсүрэн танилцууллаа.

2024 онд төрийн албаны шинэтгэлийн бодлого, хүний нөөцийн төлөвлөлт, төрийн албан хаагчийн сургалт, нийгмийн баталгааг хангасан байдалд хяналт, үнэлгээ хийж, хэрэгжилт санасан түвшинд хүрэхгүй байгааг дүгнэжээ. Хяналт, үнэлгээгээр нийт 26 арга хэмжээний 20.7 хувь нь үр дүнтэй хэрэгжсэн бол 24 арга хэмжээ эрчимжүүлэх шаардлагатай, 5 нь бүрэн дүгнэгдээгүй гэсэн үр дүн гарсан байна. Гол асуудал нь төлөвлөлт, санхүүжилтийн үндэслэл дутмаг байдалтай холбоотой аж.

Төрийн албан хаагчдын сургалт, нийгмийн баталгааны хөтөлбөрийн хэрэгжилтийг үзэхэд 44 байгууллагаас зөвхөн 35 нь баталсан хөтөлбөртэй байсан бөгөөд улсын хэмжээнд 72.1 хувийн гүйцэтгэлтэй гарчээ. Гэвч энэ нь хангалтгүй үзүүлэлт гэж дүгнэж, нэгдсэн хөтөлбөр батлахыг Засгийн газарт зөвлөсөн байна.

2021 оноос хойш хэрэгжсэн 225 төсөл, хөтөлбөрийн 60.1 хувь нь одоо хэрэгжиж байгаа бөгөөд төслийн давхардал, уялдаа холбоо муутай байгааг тодорхойлж, холбогдох байгууллагад найман төрлийн зөвлөмж хүргүүлсэн талаар мэдээлжээ.

2024 онд 21 аймаг, бүх яам, агентлаг, дүүргүүдэд ажиллаж, 4695 албан тушаалын тодорхойлолт хянаж, мэргэжил арга зүйн зөвлөгөө өгсөн байна. Үүний үр дүнд сул орон тооны захиалга өмнөх оноос 53 хувиар, томилгооны зөрчил 16.6 хувиар буурсан, хууль зөрчин бүтэц өөрчилдөг зөрчил 40 хувиар багассан талаар дурдав.

Мөн төрийн албан хаагчдын хувийн хэргийн бүртгэлийг цахим хэлбэрт шилжүүлж, тэдний хувийн мэдээлэлд нэвтрэх нөхцөлийг бүрдүүлсэн нь цахим шилжилтийн чухал алхам болсон хэмээн онцолжээ.

УИХ-ын гишүүд тайланд үнэлгээ хийдэг байгууллагын аргачлалыг нэгтгэх, төрийн албаны мэдээлэл технологийн мэргэжилтнүүдийн цалин, нийгмийн баталгааг сайжруулах талаар санал хэлсэн бол Төрийн албаны зөвлөл Засгийн газар төрийн албан хаагчийн нийгмийн баталгааны нэгдсэн хөтөлбөрийг батлаагүй нь нийт хэрэгжилтэд сөргөөр нөлөөлж байгааг тэмдэглэсэн байна.

Эх сурвалж: Улсын Их Хурлын Хэвлэл мэдээллийн газар