Улсын Их Хурлын даргын 2024 оны 82 дугаар захирамжаар байгуулагдсан ажлын хэсэг тавдугаар сарын 5-нд Жижиг, дунд үйлдвэр, үйлчилгээг дэмжих тухай хуулийн хэрэгжилттэй танилцаж, бичил бизнес эрхлэгчдийг дэмжих тогтолцоог сайжруулах хэлэлцүүлэг зохион байгууллаа.

Хэлэлцүүлгийг УИХ-ын гишүүн, ажлын хэсгийн ахлагч Д.Батлут удирдан явуулж, гишүүдээс С.Лүндэг, С.Замира, М.Бадамсүрэн, Ж.Батжаргал болон Ерөнхийлөгчийн зөвлөх Ч.Даваабаяр, Нийслэлийн захиргааны холбогдох байгууллагын төлөөлөл, ЖДҮ эрхлэгчдийн төлөөлөл оролцсон юм.

ХХААХҮЯ-ны ахлах шинжээч Э.Сугарбаяр хуулийн хэрэгжилт болон үр дүнгийн талаар мэдээлэл өгч, ЖДҮГ-ын дарга Я.Эрдэнэсайхан зээл, хөтөлбөрийн талаар танилцуулав. Хэлэлцүүлгийн үеэр дараах саналууд дэвшүүлэгджээ:

• Тоног төхөөрөмжийг гааль, НӨАТ-аас чөлөөлөх

• НӨАТ-ын босгыг нэмэгдүүлэх

• Бизнес инкубацийн хууль эрх зүйн орчин бүрдүүлэх

• ЖДҮ-ийн бүтээгдэхүүнийг борлуулалтаар дэмжих стратеги боловсруулах

• Сум бүрт ахуйн үйлчилгээний цэг байгуулах

ЖДҮ эрхлэгчид сангийн хүртээмж муу байгааг онцолж, экспортын бодлого боловсруулах, эргэлтийн хөрөнгийн дэмжлэг үзүүлэх, томоохон төслийн үр өгөөжийг нэмэгдүүлэх шаардлагатайг илэрхийлжээ.

Хэлэлцүүлгийг дүгнэж Д.Батлут гишүүн “Өрхийн бичил бизнес эрхлэгчдэд анхаарал хандуулж, худалдан авалт болон татварын хөнгөлөлтийн асуудлыг хуульд тусгах хэрэгтэй. Эрх зүйн орчныг сайжруулах чиглэлээр ажлын хэсэг судалгаа хийж байгаа тул саналаа ирүүлэн, хамтран ажиллахыг хүсье” гэж мэдэгдлээ.

Эх сурвалж: Улсын Их Хурлын Хэвлэл мэдээллийн газар