Өнгөрсөн долоо хоногт нийслэлийн 8 дүүрэг, 17 аймгийн 39 суманд аюулт үзэгдэл, ослын 158 удаагийн дуудлага Онцгой байдлын албанд бүртгэгджээ. Дуудлагын дагуу төв болон орон нутгийн Онцгой байдлын байгууллагын алба хаагчид шуурхай үүрэг гүйцэтгэн ажиллаж, 44 иргэний аюулгүй байдлыг хангаж, шаардлагатай тусламж үзүүлсэн байна.

Бүртгэгдсэн дуудлагын дийлэнх буюу 144 нь объектын гал түймэртэй холбоотой байжээ. Үүнээс гадна:

• 7 удаагийн ой хээрийн түймэр

• 2 удаагийн газар хөдлөлт

• 1 удаагийн хүчтэй салхи, шуурганы нөлөөлөл

• 4 удаагийн хүний үйл ажиллагаатай холбоотой ослын дуудлага бүртгэгдсэн байна.

ОБЕГ-аас өгсөн мэдээллээр, гал түймрийн дуудлагын тоо өндөр байгаа нь иргэд, аж ахуйн нэгжүүдийн галын аюулгүй байдлын сахилга бат, анхаарал хандуулалттай шууд холбоотой хэмээн анхааруулсан байна. Иймээс иргэдийг галын аюулгүй байдлыг чанд сахиж, онцгой нөхцөлд хариу арга хэмжээ авах мэдлэг, бэлтгэлийг сайжруулахыг уриалж байна.

Эх сурвалж: Онцгой байдлын ерөнхий газар