Гадаад харилцааны сайд Б.Батцэцэг Исланд Улсад хийж буй албан ёсны айлчлалынхаа хүрээнд тус улсын Парламентын дарга Торунн Свейнбярнардоттирт баасан гарагт бараалхлаа. Уулзалтын үеэр сайд Б.Батцэцэг Монгол Улсын 2024 оны сонгуулийн үр дүн, хамтарсан Засгийн газрын тэргүүлэх зорилтуудыг танилцуулсан байна.
Тэрбээр Монгол, Исланд хоёр улс нь ардчилал, хүний эрх, хууль дээдлэх зарчим зэрэг нийтлэг үнэт зүйлс дээр тулгуурласан найрсаг харилцаатай гэдгийг онцлон тэмдэглэж, цаашид нийгэм, эдийн засгийн олон салбарт хамтын ажиллагааг өргөжүүлэх хүсэлтэй байгаагаа илэрхийлжээ. Тэр дундаа аялал жуулчлал, сэргээгдэх эрчим хүчний салбар нь хамтын ажиллагааны тэргүүлэх чиглэл байх боломжтойг дурдсан байна.
Парламентын дарга Торунн Свейнбярнардоттир хоёр улсын уламжлалт найрсаг харилцаа цаашид ч хоёр талын хүчин чармайлтаар гүнзгийрэн өргөжихөд итгэлтэй байгаагаа илэрхийлж, хууль тогтоох байгууллагууд хоорондын хамтын ажиллагааг хөгжүүлэхэд дэмжлэг үзүүлэхээ мэдэгдсэн юм.
Мөн сайд Б.Батцэцэг Исландын парламентын гадаад бодлого, аюулгүй байдлын Байнгын хорооны гишүүдтэй уулзаж, хоёр улсын харилцааг хөгжүүлэх, харилцан туршлага солилцох, олон улсын харилцааны асуудлаар санал бодлоо хуваалцан, Монгол Улсын гадаад бодлогын зорилт, үйл ажиллагааг танилцуулжээ.
Эх сурвалж: ГХЯ
