УИХ дахь АН-ын бүлэг чуулганы хуралдаанаас завсарлага аваад хоёр дахь өдрөө болов. Намын бүлгээс тавьсан шаардлагыг хүлээж аваагүй гэдэг чуулганы хуралдаанаас гурав хоногийн завсарлага хүссэн. УИХ-ын дарга Д.Амарбаясгалан "чуулганы хуралдаан даваа гаригт үргэлжилнэ" гэсэн боловч УИХ-ын нэгдсэн чуулган АН-ын бүлгийн оролцоогүйгээр хоёр дахь өдрөө үргэлжлэв. Энэ талаар УИХ дахь Ардчилсан намын бүлгээс мэдээлэл хийлээ. 

УИХ-ын гишүүн, Хүний эрхийн дэд хорооны дарга С.ЭРДЭНЭБОЛД:

-Өнөөдөр УИХ-ын чуулганы хуралдааны үеэр Их хурлын дарга Д.Амарбаясгалан мэдээлэл хийсэн. Ард түмний амьдрал сайнгүй байгаа, шийдэх асуудал их байгаа тухай хэлсэн. Бид үүнтэй санал нэг байна. Ард түмний амьдрал сүүлийн таван жил ямар нөхцөлд байгаа, яагаад хэцүү байгаа тухай хэдэн тоо баримтыг хэлье.

2020, 2025 оны тавдугаар сарын 1-ний өдрийг харьцуулъя. 2020 онд талхны үнэ 1300 төгрөг байсан бол өнөөдөр 2640 төгрөг буюу 103.7 хувиар өссөн байна. Гурилын үнэ 2020 онд 2100 төгрөг байсан бол одоо 3000 төгрөг давж 40 гаруй хувиар өссөн байна. Төмс, луувангийн үнэ 1200-1550 байсан бол 1500-3788 төгрөг болсон.

Өнөөдөр парламент бодлого гаргаж, хэлэлцэх ёстой. Гэхдээ бодлого хэлэлцэх явцад бид суурь зарчмуудаа, парламентат ёсныхоо дархлааг алдсаар байна.