Монгол Улсын Шадар сайд, Бүсчилсэн хөгжлийн Үндэсний хорооны дарга С.Амарсайхан гадаад улс орнуудын элчин сайд, олон улсын байгууллага, донор, хандивлагч байгууллагуудын төлөөлөлтэй уулзаж, бүсчилсэн хөгжлийн бодлого болон Засгийн газрын 2024-2028 оны үйл ажиллагааны хөтөлбөрийг танилцуулан санал солилцлоо.

Уулзалтын үеэр Шадар сайд С.Амарсайхан “Монгол Улсын бүсчилсэн хөгжлийн үзэл баримтлал”-ыг анх 2001 онд УИХ-аас баталж, 24 жилийн хугацаанд хэрэгжүүлсэн ч Улаанбаатар хотод хүн ам, эдийн засаг, боловсрол, үйлчилгээний хэт төвлөрөл үүссэн нь бүсчилсэн хөгжлийн бодлогын ач холбогдлыг улам тодотгож байна хэмээн онцолсон. Тухайлбал, өнөөдрийн байдлаар Монгол Улсын нийт хүн амын 50 орчим хувь буюу 1.7 сая хүн нийслэлд амьдарч, ДНБ-ий 63 хувь нь энд үйлдвэрлэгдэж, их дээд сургуулийн 96 хувь нь төвлөрсөн байна.

Шинэ шатны бүсчилсэн хөгжлийн бодлого хэрэгжсэнээр дараах өөрчлөлт, боломжууд бүрдэнэ:

• Бүс, орон нутгийн эдийн засгийн чиг үүргийг оновчтой тодорхойлох

• Байгалийн нөөц баялгийг зохистой, үр өгөөжтэй ашиглах, нөхөн сэргээх

• Үйлдвэр, үйлчилгээний төрөлжилт, хоршил, кластерын бодлогыг дэмжих

• Өндөр технологи, инновацыг орон нутагт нэвтрүүлэх

• Бүс дамнасан стратегийн төслүүдийг хэрэгжүүлэх

• Хөрөнгө оруулалтыг оновчтой хуваарилах (улсын төсөв, зээл, тусламж, ТХХТ г.м)

• Санхүү, татварын ялгаатай бодлого хэрэгжүүлэх

• Оролцогч талуудын хамтын ажиллагааг өрнүүлэх

• Тээвэр, логистик, дэд бүтцийн нэгдсэн сүлжээ хөгжүүлэх

• Шинэ суурьшлын бүс, хотууд байгуулах

• Бүс нутгийн эдийн засгийн интеграцид нэгдэх, зах зээл тэлэх

• Хөдөлмөр эрхлэлтийг дэмжих, ажилгүйдэл, ядуурлыг бууруулах

• Бизнес эрхлэх таатай орчныг бүрдүүлсэн бүсүүдийг бий болгох

Энэхүү уулзалт нь бүсчилсэн хөгжлийн бодлогыг олон улсын түншүүдтэй уялдуулах, гадаадын хөрөнгө оруулалт, техник туслалцааг оновчтой чиглүүлэх, хамтран ажиллах шинэ боломжуудыг бүрдүүлэх алхам боллоо.

Эх сурвалж: Монгол Улсын Шадар сайдын Тамгын газар