Гадаад харилцааны сайд Б.Батцэцэг Испанийн Хаант Улсад хийж буй албан ёсны айлчлалынхаа хүрээнд тус улсын Гадаад хэрэг, Европын холбоо, хамтын ажиллагааны яамны дэргэдэх Дипломат академид зочиллоо. Энэхүү айлчлалын үеэр хоёр талын хамтын ажиллагааг өргөжүүлэх чухал алхмуудыг тохиролцсон байна.
Дипломат академийн захирал, Элчин сайд Сесилиа Роблес Картес тус академийн бүтэц, үйл ажиллагаа, сургалтын агуулгыг дэлгэрэнгүй танилцуулжээ. Уулзалтын явцад сайд Б.Батцэцэг олон улсын харилцааны хурдан өөрчлөгдөж буй нөхцөл байдалд нийцсэн, испани хэлтэй, мэргэжлийн дипломат боловсон хүчин бэлтгэхийн тулд тус академитай хамтран ажиллах сонирхлоо илэрхийлж, талууд энэ чиглэлд хамтран ажиллахаар харилцан тохиролцсон байна.
Мөн Гадаад харилцааны сайд тус академид олон улсын харилцааны магистрын хөтөлбөрт суралцаж буй оюутнуудад лекц уншиж, Монгол Улсын гадаад бодлого, түүний тэргүүлэх чиглэл, олон талт хамтын ажиллагааны талаарх мэдээллийг хүргэжээ.
Дипломат академи нь 1942 онд Мадрид хотноо байгуулагдсан бөгөөд Испанийн их дээд сургуулиудтай хамтран олон улсын харилцаа, олон улсын хууль зэрэг чиглэлээр мэргэшсэн мэргэжилтэн бэлтгэдэг. Түүнчлэн Европын холбоо, протокол, ислам судлал, хүний эрх зэрэг чиглэлээр төрөлжсөн сургалтууд явуулдаг бөгөөд жил бүрийн хичээлийн нээлтийн ажиллагаанд Испанийн хаан болон Гадаад хэргийн сайд оролцдог уламжлалтай ажээ.
Эх сурвалж: Монгол Улсын Гадаад харилцааны яам
