Узбекистан улсад жил бүр зохион байгуулагддаг Олон улсын дугуйн холбооны 2.2 ангиллын “Tour of Bostonliq” гурван өдрийн уралдаан амжилттай өндөрлөлөө. Уралдаанд манай улсаас хоёр тамирчин оролцож, багийн болон хувийн амжилтаараа онцгой байрыг эзэллээ.
Монголын үндэсний шигшээ баг, “Алдар” спорт хороо болон Тайландын “Roojai insurance” багийн нэрийн өмнөөс уралдсан олон улсын хэмжээний мастер Б.Тэгшбаяр нийт 08 цаг 24 минут 03 секундын амжилтаар нийлбэр дүнгээр есдүгээр байрт шалгарсан байна. Тэрээр уралдааны эхний гараанд түрүүлж, сүүлийн гараанд хоёрдугаар байр эзэлсэн нь түүний тогтвортой амжилтыг илтгэж байна.
Харин АНЭУ-ын “UAE Ministry of Defence Cycling Team” багийн нэрийн өмнөөс уралдсан Б.Марал-Эрдэнэ (Catco Racing Team) 08:45:29 хугацаатайгаар 55 дугаар байрт орсон байна.
Тэмцээний хувийн төрөлд “Li Ning Star” багийн Шинэ Зеландын тамирчин Жошуа Кенч тэргүүлж, Б.Тэгшбаярын хамтрагч, Кипр улсын тамирчин Андреас Милтиадис удаалсан юм. Хэдий энэ удаа Б.Тэгшбаяр хувийн амжилтаараа өнгөрсөн жилийн түрүүгээ баталгаажуулж чадаагүй ч “Roojai insurance” багийн бүрэлдэхүүнд орж, багийн дүнгээр түрүүлсэн нь онцлох үр дүн боллоо.
Өнгөрсөн жилийн “Tour of Bostonliq” уралдаанд Үндэсний шигшээ багийн Б.Тэгшбаяр 1, С.Жамбалжамц 3, Х.Тэмүүлэн 35, А.Даваажаргал 42, Э.Билгүүнжаргал 46 дугаар байрт шалгарч, багийн дүнгээр дөрөвдүгээр байр эзэлж байсан билээ.
Эх сурвалж: Олон улсын дугуйн холбоо, “Tour of Bostonliq” зохион байгуулагчид
