Батлан хамгаалахын сайд С.Бямбацогт дөрөвдүгээр сарын 29-нд Сэлэнгэ аймгийн Сант суманд ажиллажээ. Энэ үеэрээ хуучнаар Хөдөө аж ахуйн техник мэргэжлийн сургуулийн барилгын нөхцөл байдалтай газар дээр нь танилцсан байна.
Тус барилга нь 1980 онд ХААТМС-ийн зориулалтаар баригдаж, тухайн үедээ 1000 гаруй оюутан суралцаж, хөдөө аж ахуйн мэргэжилтэй боловсон хүчнийг бэлтгэдэг чухал төв байжээ. Гэвч сүүлийн 30 гаруй жил ашиглагдаагүй, орхигдсон байдалтай байсан уг барилгыг Зэвсэгт хүчин хариуцаж авахаар болсон байна.
Сайд С.Бямбацогт барилгыг сэргээн засварлаж, барилгын цэргийн анги болон ахлагчийн сургууль болгон дахин ашиглах шийдвэрийг гаргаснаа мэдэгдэв. Энэхүү шийдвэр нь орон нутагт ажлын байр бий болгох, төвлөрлийг сааруулах, газар тариалангийн бүс нутгийн онцлогт тулгуурлан хөгжлийг дэмжих зорилготой болохыг онцлон тэмдэглэжээ.
Мөн Зэвсэгт хүчин нь орон нутгийн иргэдтэй хамтран ажиллаж, түншлэл хөгжүүлэн, бүс нутгийн хөгжлийг дэмжих чиглэлээр идэвхтэй оролцоно гэдгээ илэрхийлсэн байна.
Сайдын албан томилолтод Батлан хамгаалах яамны Төрийн захиргаа удирдлагын газар, Хуурай замын цэргийн командлал, Хяналт шинжилгээ үнэлгээний газар, Барилга инженерийн цэргийн удирдах газар болон Бодлогын хэрэгжилтийг зохицуулах газрын удирдлагууд дагалдан ажиллалаа.
Эх сурвалж: Батлан хамгаалах яам
