Монгол Улсын дотоодын цэргийн албыг хааж буй залуус нэг жилийн хугацаанд зөвхөн эх орныхоо өмнө хүлээсэн үүргээ биелүүлээд зогсохгүй, мэргэжил эзэмших боломжийг хамтад нь олж авч байна. Цэргийн албаны явцад залуучууд хүнд машин механизмын оператор, цахилгаанчин, сантехникч зэрэг эрэлттэй мэргэжлийн сургалтад хамрагдах боломжтой бөгөөд улмаар ажлын байртай холбогдох алхмыг хялбаршуулж байгаа юм.

Түүнчлэн дотоодын цэргийн албыг хаасан залуус цэргийн байгууллагад байнгын ажилтан болох хүсэлт гаргах, жолооны сургалтад хамрагдаж жолооны үнэмлэхтэй болох зэрэг амьдралд шууд хэрэгтэй ур чадваруудыг эзэмших боломжтой байдаг. Зарим тохиолдолд төрийн бус байгууллагуудтай хамтран ажиллаж, алба хаагчдыг мэргэжлийн үнэмлэхтэй болгох хөтөлбөрүүдийг амжилттай хэрэгжүүлжээ.

Алба хаагчдын хэлж буйгаар, цэргийн алба нь тэдэнд зөвхөн дэг журам, хариуцлага сургаад зогсохгүй, хүний амьдралд чухал ур чадваруудыг эзэмшүүлэх, өөрийгөө нээх боломж олгодог аж. Залуу нэгэн алба хаагч “Хүнийг яаж хүндлэх вэ, хүнтэй яаж харьцах вэ гэдгээ ойлгосон. Эхийн хайрыг л их мэдэрсэн” хэмээн сэтгэгдлээ хуваалцжээ.

Дотоодын цэргийн байгууллагууд залуучуудад хандан, “Цэргийн албанд биеэр ирж, өөрийгөө сорьж үзээрэй. Энэ хугацаанд сурч, төлөвшиж, амьдралд хэрэгтэй мэдлэг, чадвар олж авна” хэмээн уриалж байна. Цаашид ч дотоодын цэргийн албаны бүтэц, хөтөлбөрүүдийг боловсронгуй болгож, мэргэжлийн чиг баримжаатай, өөртөө итгэлтэй иргэдийг нийгэмд бэлтгэх чухал алхам болгохыг зорьж буйг холбогдох албаныхан онцолжээ.

Эх сурвалж: Дотоодын цэргийн ерөнхий газар