Монгол Улсын Ерөнхийлөгч Ухнаагийн Хүрэлсүх Бүгд Найрамдах Чех Улсын Прага хотын амьтны хүрээлэнгийн захирал Мирослав Бобек болон Карлын их сургуулийн Монгол судлалын төвийн багш, монголч эрдэмтэн Вероника Каписовска нарыг Төрийн ордонд хүлээн авч уулзлаа. Уулзалтын үеэр тэрбээр Чехийн талын 30 гаруй жилийн хамтын ажиллагааг өндрөөр үнэлж, байгаль хамгааллын чиглэлээр Монгол Улсад үзүүлж ирсэн хувь нэмэрт гүн талархал илэрхийллээ.
Прага хотын амьтны хүрээлэнгийн санаачилсан тахийг сэргээн нутагшуулах хөтөлбөр нь зөвхөн нэг төрлийн зэрлэг амьтан хамгаалахаас хальж, Говийн их дархан цаазат газрын хамгаалалтын чадавх, судалгаа шинжилгээ, боловсон хүчний хөгжилд бодитой дэмжлэг үзүүлж иржээ.
Монгол Улсын Ерөнхийлөгчийн ивээл дор Дорнод аймгийн Халх гол сумын нутагт орших Нөмрөгийн дархан цаазат газарт тахийг шинээр нутагшуулах төсөл хэрэгжүүлэхээр тохиролцсон бөгөөд үүнд:
-
Бүс нутгийн экологийн үнэлгээ хийх
-
Тусгай хамгаалалтад авах шаардлагатай газар нутгийг тогтоох
-
Мэргэжлийн зөвлөгөө, дэмжлэг үзүүлэх зэрэг хамтын ажиллагааны чиглэлүүд багтсан байна.
Энэхүү уулзалт нь Ерөнхийлөгч У.Хүрэлсүхийн 2025 оны гуравдугаар сард Бүгд Найрамдах Чех Улсад хийсэн төрийн айлчлалын үргэлжлэл бөгөөд тус айлчлалын үеэр ярилцсан санал, санаачилгууд ажил хэрэг болж буйг илтгэж байна. Тус айлчлалын үеэр Ерөнхийлөгч Прага хотын амьтны хүрээлэнд шинээр төрсөн тахийн унаганд “Дагина” хэмээх нэр хайрласан нь хоёр улсын байгаль хамгааллын хамтын ажиллагааны бэлгэдэл болсон юм.
Прага хотын амьтны хүрээлэн 2024 оны гуравдугаар сард “Монголын говь” нэртэй байнгын үзмэр нээж, монгол гэр, гэрэл зургийн үзэсгэлэн, тахь нутагшуулах төслийн үр дүнг олон нийтэд толилуулсаар байна. Мөн Чехийн Ерөнхийлөгч Петр Павел Зэвсэгт хүчний Жанжин штабын даргаар ажиллаж байхдаа тахийг цэргийн онгоцоор Монголд тээвэрлүүлэх шийдвэр гаргаж байсан нь төслийн амжилтад онцгой хувь нэмэр оруулсан түүхтэй.
Өнөөдрийн байдлаар Хустайн нуруу, Хомын тал зэрэг бүс нутагт тахийн тоо толгой 1,000 гаруйд хүрчээ.
Эх сурвалж: Монгол Улсын Ерөнхийлөгчийн Тамгын газар
