Өнгөрөгч баасан гаригт УИХ-ын нэгдсэн чуулганы Засгийн газрын цаг дээр Ерөнхий сайд Л.Оюун-Эрдэнээс асуулт асуусан УИХ гишүүн Ж.Баярмааг "Баярцогт гишүүн ээ" хэмээн дуудаж, өмнөх Засгийн газрын хариуцлагуудыг ярьсан. Энэ нь УИХ-ын гишүүний бүрэн эрхэд халдаж, иргэд сонгогчдыг доромжилсон ёс зүйгүй үйлдэл хэмээн үзэж, УИХ дахь АН-ын бүлэг Ерөнхий сайд Л.Оюун-Эрдэнийг Ж.Баярмаа гишүүнээс уучлал гуйхыг шаардсан.

Мөн энэ шаардлагыг биелүүлээгүй гэдэг үндэслэлээр АН-ын бүлэг өнөөөдрийн УИХ-ын нэгдсэн чуулганаас завсарлага авсан билээ. Уг асуудлаар УИХ-ын гишүүн Н.Номтойбаяр өнөөдөр /2025.05.01/ сэтгүүлчдийн асуултад хариулжээ.

Н.Номтойбаяр: 

-2016 оны УИХ-ын сонгуулиас хойш ялсан намын дарга Ерөнхий сайд хийж ирснээр парламент Засгийн газрын дэргэдэх хууль зүйн хэлтэс шиг л явж ирсэн. АН-ын байр суурийг би хувьдаа Монгол Улс бол Үндсэн хуулиар заасан парламентын засаглалтай улс орон шүү гэдгийг сануулж байгаа нэг том үйлдэл гэж харж байгаа.

Нөгөө талаас Ерөнхий сайдын гаргасан үйлдэл нь парламентын үйл ажиллагааг Засгийн газрын өргөн барьсан хуулийг ёсчлон баталдаг процесс мэтээр хардаг болсны илэрхийлэл юм болов уу гэж дүгнэж байгаа. Парламентад ус, агаар мэт дутагдсан зүйл бол мэдлэгт суурилсан мэтгэлцээн явагддаггүй. УИХ-ын гишүүдийн асуултад сайд нар хариулах үүрэгтэй. Гэтэл худал ярьдаг, асуултаас бултдаг, зарим нь бүр хуралдаа ч суудаггүй

Уучлалт гуйх эсэх асуудлын тухайд хуулиа дагах уу, хүн чанар, ёс суртахуунаа дагах уу гэдэг хоёр асуудал. Хуулиараа бол Ерөнхий сайд УИХ-ын гишүүн. УИХ-ын гишүүн чуулганы үеэр хэлсэн үгэндээ хариуцлага хүлээдэггүй. Хүн чанарын хувьд үл ойлголцох, ойлголцох зүйлс бишгүйдээ болдог. Би байсан бол хувьдаа өрөөнд нь ороод уучлалт гуйна.