Нийслэлийн өмч хөрөнгийг хууль ёсоор хамгаалж, алдагдсан хөрөнгийг үе шаттайгаар эргүүлэн авах ажлыг нийслэл зорилтот төлөвлөгөөний дагуу хэрэгжүүлж байна. Энэ хүрээнд Сүхбаатар дүүргийн нутаг дэвсгэрт байрлах “Баруун Сэлбэ” үйлчилгээний төвийн “Ж” блокийн зүүн жигүүрт орших, “Улаанбаатар Радио”-д хамаарах нийт 1222 ам метр талбайг нийслэлийн өмчид буцаан авлаа.
Уг гурван давхар барилга нь 1991 онд худалдааны төвийн зориулалтаар ашиглалтад орсон бөгөөд 1999 онд УИХ-ын 29 дүгээр тогтоолоор нийслэлийн өмчид шилжин ирж, нийслэлийн Өмчийн харилцааны газрын балансад бүртгэгджээ. Харин 2004 оноос эхлэн тус төвийн зарим талбайг түрээслэгч иргэн, аж ахуйн нэгжүүдэд хувьчилсан бөгөөд нийт 14 эзэмшигчтэй болсон байна.
Гэхдээ “Улаанбаатар Радио”-гийн эзэмшиж байсан 1222 ам метр талбайг тухайн үед хувьчлаагүй байжээ. Энэхүү талбайг тус радио менежментийн хувьчлалаар эзэмшсэн нь үнэн боловч 2008 онд шүүхийн шийдвэрээр уг хувьчлал хүчингүй болсон байна.
Ийнхүү олон жил маргаантай байсаар ирсэн асуудлыг шийдвэрлэж, тус талбайг нийслэл хууль ёсоор өөрийн өмчид буцаан авч, цаашдын төсөл хөтөлбөр хэрэгжүүлэх боломж бүрдүүлээд байна. Түүнчлэн тус барилгын гадна байрлах ашигладаггүй гүүрэн байгууламж болон гараашуудыг нурааж, газар ашиглалтыг сайжруулах замаар нийтийн хэрэгцээнд нийцсэн төсөл хэрэгжүүлэхээр төлөвлөжээ.
Эх сурвалж: Нийслэлийн Өмчийн харилцааны газар
