Монгол Улсын Их Хурлын Ерөнхий нарийн бичгийн дарга Б.Баасандорж манай улсад албан ёсны айлчлал хийж буй Бутаны Хаант Улсын парламентын дээд, доод танхимын төлөөлөгчидтэй уулзлаа. Уулзалтад Бутаны Үндэсний Ассамблейн Тамгын газрын Ерөнхий нарийн бичгийн дарга Д.Дуба тэргүүлэн оролцсон бөгөөд төлөөлөгчид Монгол Улсын парламентын иргэний нийгэм болон Засгийн газартай харилцах туршлагыг судалж байна.

Б.Баасандорж уулзалтын үеэр 2023 онд Монгол Улсын Үндсэн хуульд орсон нэмэлт, өөрчлөлт болон хууль тогтоох байгууллагын 126 гишүүнтэй болсон талаар мэдээлэл өгч, эмэгтэй гишүүдийн тооны өсөлтөөр Ази тивд Узбекстанаас хойш хоёрдугаарт бичигдэж байгааг онцолсон. Мөн хүний эрх, иргэний болон улс төрийн эрхийн хэрэгжилт, төрийн бус байгууллагын эрх зүйн орчин, иргэний нийгмийн хамтын ажиллагааны бодлогыг танилцуулсан юм.

Үндэсний Ассамблейн нарийн бичгийн дарга Д.Дуба Монгол Улсын парламентын үйл ажиллагааг сайшааж, Бутаны хууль тогтоох байгууллага стратегийн баримт бичгүүдээ баталж, иргэний нийгмийн төлөөлөлтэй шууд харилцах тогтолцоог хөгжүүлж байгааг танилцуулав. Тэрбээр Бутан-Монголын парламентын таван гишүүнтэй бүлэг ажиллаж буйг онцолж, хоёр улсын түүх, соёл, шашин шүтлэг ижил төстэй байгааг дурдлаа.

Талууд парламентын бүтэц, эрх зүйн зохицуулалт, ардчиллын суурь болсон хүний эрхийг хууль тогтоох үйл ажиллагаанд хэрхэн хангаж байгаа талаар мэдээлэл солилцож, туршлагаа хуваалцсан юм.

Уулзалтад УИХ-ын Тамгын газрын Тэргүүн дэд дарга Ч.Ариунхур, Бутаны парламентын Иргэний нийгмийн зөвлөлийн гишүүн Пема Дэнзэн, Транспаренси Интернэшнл байгууллагын гүйцэтгэх захирал Дэнзэн Тинли болон бусад албаны төлөөлөгчид оролцсон талаар УИХ-ын Хэвлэл мэдээллийн газраас мэдээллээ.

Эх сурвалж: УИХ-ын Хэвлэл мэдээллийн газар