Монгол Улсын Ерөнхийлөгч У.Хүрэлсүхийн ивээл дор “Монгол дархны уламжлал, шинэчлэл” сэдэвт үндэсний анхдугаар чуулган 2025 оны дөрөвдүгээр сарын сүүлчээр Төрийн ордонд боллоо. Чуулганы гол зорилго нь уламжлалт уран дархны урлагийг соёлын бүтээлч үйлдвэрлэлтэй уялдуулан хөгжүүлэх, төрийн бодлогыг тодорхойлох, тулгамдаж буй асуудлыг шийдвэрлэхэд оршив.

Чуулганы нээлтэд Ерөнхийлөгч У.Хүрэлсүх уран дархчуудыг хүндэтгэн угтан үг хэлж, монгол дархны урлаг бол тусгаар тогтнолын дархлаа, өв соёлын үнэт зүйл гэдгийг онцоллоо. Тэрбээр “Монгол төрийн сүр хүч, ард түмний оюуны ур чадварын илэрхийлэл болсон дархны бүтээл нь түүх, соёлын хосгүй өв болдог” хэмээн дурдсан юм. Мөн энэ чуулганыг дөрвөн жил тутам уламжлал болгон зохион байгуулахыг санал болголоо.

Чуулганы хүрээнд хэлэлцсэн гол сэдвүүд:

• Монгол уран дархны соёлын үнэ цэн, хөгжлийн чиг хандлага

• Хууль эрх зүйн орчны сайжруулалт, санхүүгийн дэмжлэг

• Соёлын бүтээлч үйлдвэрлэлийн хөгжлийн асуудал

• Дархны түүхий эдийн хангамж, түүний зохицуулалт

• Хүний нөөц, залгамж халаа бэлтгэх асуудал

Соёлын сайд Ч.Номин дархны бүтээлийг эдийн засгийн эргэлтэд оруулах, аялал жуулчлалын бүтээгдэхүүн болгон хөгжүүлэх шаардлагыг дурдсан бол Ерөнхийлөгчийн ахлах зөвлөх Н.Хүрэлбаатар нийгмийн хамгаалал, эрх зүйн орчныг бүрдүүлэх, залуу дархчуудыг дэмжих тогтолцоог бий болгох хэрэгцээг онцоллоо.

Аж үйлдвэр, эрдэс баялгийн сайд Ц.Туваан дархчуудын түүхий эдийн хангамжийг дотоодоос шийдэх эрх зүйн зохицуулалтыг боловсруулах хэрэгтэйг тэмдэглэж, жилд 200 кг орчим алтны хэрэгцээг дотоодын хэрэгцээнд хангах асуудлыг анхаарахыг уриаллаа.

Тус чуулганд 21 аймаг, нийслэлийн есөн дүүргээс дархчууд, гар урчууд, төр, хувийн хэвшлийн төлөөлөл, судлаачид, бодлого боловсруулагчид оролцож, бүтээлээ дэлгэн үзүүллээ. Монгол Улсад одоогоор 4000 орчим уран дархан бий гэсэн албан бус тоо баримт байдаг бөгөөд тэдний ихэнх нь орон нутагт амьдарч, ажиллаж байна.

Эх сурвалж: Монгол Улсын Ерөнхийлөгчийн Тамгын газар, Соёлын яам, Аж үйлдвэр, эрдэс баялгийн яам