2025 оны хаврын ээлжит чуулганы өнөөдрийн үдээс өмнөх нэгдсэн хуралдаан 10:00 цагт гишүүдийн 57.1 хувийн ирцтэйгээр эхэлж, гурван асуудлыг хэлэлцэхээр төлөвлөсөн ч хэлэлцүүлэг бүрт завсарлага авснаар хуралдаан түр завсарлалаа.

Хуралдааны эхэнд УИХ-ын дарга Д.Амарбаясгалан хууль санаачлагчдаас өргөн мэдүүлсэн хуулийн төслүүдийг холбогдох Байнгын хороонд хуваарилсан талаар мэдээлэл хийв. Үүнд:

• Монгол Улсын 2026 оны төсвийн хүрээний мэдэгдэл, 2027–2028 оны төсвийн төсөөллийн тухай хуулийн төсөл,

• “Засгийн газрын өрийн удирдлагын 2026–2028 оны стратегийн баримт бичиг батлах тухай” УИХ-ын тогтоолын төсөл — Төсвийн байнгын хороонд,

• “Монгол Улсын хөгжлийн 2026 оны төлөвлөгөө батлах тухай” тогтоолын төсөл — Эдийн засгийн байнгын хороонд тус тус шилжүүлсэн байна.

Үүний дараа Ардчилсан намын бүлгийн дарга О.Цогтгэрэл дараах асуудлуудад бүлгийн саналаа нэгтгэх шаардлагатай хэмээн үзэж, гурван өдрийн завсарлага авах хүсэлтээ танилцуулав. Үүнд:

1. Зээлийн мэдээллийн тухай хуульд нэмэлт, өөрчлөлт оруулах тухай хуулийн төслийн хэлэлцүүлэг

2. Жагсаал, цуглаан хийх эрх чөлөөний тухай хууль (шинэчилсэн найруулга) болон холбогдох бусад хуулийн төслүүдийн хэлэлцэх эсэх асуудал

3. Эрүүл мэндийн даатгалын үндэсний зөвлөлийн гишүүн томилох, чөлөөлөх асуудал

Чуулганы хуралдааны дэгийн тухай хуулийн дагуу УИХ-ын дарга эдгээр асуудал тус бүрт нэг өдрийн завсарлага өгөхөөр шийдвэрлэсэн тул өнөөдрийн үдээс өмнөх нэгдсэн хуралдаан түр завсарлалаа.

Үдээс хойших хуралдаанаар Монгол Улс дахь хүний эрх, эрх чөлөөний байдлын талаарх 24 дэх илтгэлийг хэлэлцэхээр товлосон байна.

Эх сурвалж: Улсын Их Хурлын Хэвлэл мэдээллийн газар