Засгийн газрын 2025 оны дөрөвдүгээр сарын 30-ны ээлжит хуралдаанаар Аж ахуйн нэгжийн орлогын албан татварын тухай хуульд заасан татварын хөнгөлөлтийн хэрэгжилттэй холбоотой асуудлыг хэлэлцэж, Сангийн сайд Б.Жавхлан хуралдаанд танилцуулга хийлээ.

Уг хөнгөлөлт нь нийгмийн хөгжилд чиглэсэн төсөл, хөтөлбөр, хөрөнгө оруулалтыг дэмжих зорилготой бөгөөд төрийн зарим үүргийг хувийн хэвшлийн оролцоотойгоор гүйцэтгэх замаар татварын хөнгөлөлт эдлэх боломжийг бий болгож буй юм. Засгийн газраас ААНОАТ-ын тухай хуульд нэмэлт, өөрчлөлт оруулж, нийгмийн хариуцлагатай бүтээн байгуулалт, санаачилгыг урамшуулах хууль эрх зүйн үндсийг бүрдүүлсэн.

Тус хөнгөлөлтөд хамрагдах төслүүдэд тавигдах шаардлага, стандарт, босго үзүүлэлтүүдийг тухайн яам, агентлагууд өөрийн салбарын бодлоготой уялдуулан боловсруулж, тавдугаар сард багтаан улсын нэгдсэн бүртгэлд бүртгүүлэх үүргийг холбогдох сайд нарт өглөө.

Мөн Татварын ерөнхий газрын дарга Ч.Чимидсүрэн:

• Албан татварын хөнгөлөлт эдлэхтэй холбоотой зөвлөмж гаргах,

• Арга зүйн зөвлөгөө өгөх,

• Хэрэгжилтэд хяналт тавих зэрэг үүрэг хүлээж ажиллахаар болсон байна.

Ийнхүү салбар яамд нийгмийн тулгамдсан асуудлыг төрийн төсвөөс хамааралгүйгээр шийдвэрлэх бодлого хэрэгжүүлж, хувийн хэвшлийн бүтээлч оролцоог татах шинэ нөхцөл бүрдэж байна. Үүний тулд Захиргааны ерөнхий хуульд нийцүүлэн тодорхой шалгуур, ил тод зохицуулалт бүхий бодлогын баримт бичиг батлах шаардлагатай гэж үзэж байна.

Эх сурвалж: Монгол Улсын Засгийн газар