Гэр бүл, хүүхэд, залуучуудын хөгжлийн газрын Нэгдсэн бодлого төлөвлөлтийн газрын дарга Б.Алимаа болон холбогдох албан хаагчид Бүгд Найрамдах Киргиз Улсын Нийгмийн сангийн газрын Тэтгэвэр, тарифын бодлогын газрын дарга Жылдыз Кулжанова тэргүүтэй төлөөлөлтэй цахимаар уулзалт хийж, хоёр улсын нийгмийн хамгааллын тогтолцоо, тэтгэврийн бодлогын талаар харилцан туршлага солилцлоо.
Уулзалтад ГБХНХЯ-ны Нийгмийн даатгал, хуримтлалын сангийн Хуримтлалын нэгдсэн сангийн хэлтсийн дарга А.Хишигбаяр оролцож, Монгол Улсын нийгмийн даатгалын тогтолцоог танилцууллаа. Тэрбээр гадаад оронд ажиллаж, амьдарч буй монгол иргэдийн нийгмийн хамгааллын эрхийг хангах нь чухал зорилт болохыг онцолж, “Алсын хараа–2050” бодлогын баримт бичигт энэ чиглэлээр тодорхой зорилтууд тусгагдсаныг дурдсан байна.
2023 оны байдлаар БНКУ-д ойролцоогоор 130 орчим монгол иргэн, Монгол Улсад 60 гаруй киргиз иргэн оршин сууж байгааг Гадаад харилцааны яам мэдээлжээ. Цаашид энэхүү тоо нэмэгдэх хандлагатай тул хоёр улсын иргэдийн нийгмийн хамгааллын эрхийг хангасан тогтолцооны хэрэгцээ шаардлага нэмэгдэж байна.
Монгол Улс одоогоор ОХУ, БНСУ, Унгар, Польш, Турк, Чех зэрэг зургаан улстай нийгмийн хамгааллын хэлэлцээр байгуулсан бөгөөд 2024 онд Казахстантай тэтгэврийн хамтын ажиллагааны хэлэлцээр байгуулж, энэ онд УИХ-аар соёрхон батлуулахаар төлөвлөж байна. Мөн ОХУ-тай байгуулсан хуучин хэлэлцээрийг шинэчилж, Австри, Австрали улстай шинээр хэлэлцээр байгуулах зорилт дэвшүүлжээ.
Эх сурвалж: ГБХНХЯ, Гадаад харилцааны яам
