Гадаад харилцааны сайд Б.Батцэцэг Испанийн Хаант Улсад хийж буй албан ёсны айлчлалынхаа хүрээнд Мадрид хотноо байрлах Дэлхийн аялал жуулчлалын байгууллага (ДАЖБ)-ын төв байранд зочилж, тус байгууллагын Ерөнхий нарийн бичгийн дарга Зураб Пололикашвилитай ажлын уулзалт хийлээ.

Уулзалтын үеэр сайд Б.Батцэцэг Монгол Улсын Засгийн газар аялал жуулчлалыг эдийн засгийн тэргүүлэх салбар болгохоор зорьж буйг онцлоод, “Монголд зочлох жил”-ийн хүрээнд хэрэгжүүлж буй арга хэмжээ, GoMongolia үндэсний брэндийн олон улсын танилцуулга зэрэг ажлуудыг танилцууллаа. Түүнчлэн Ерөнхий нарийн бичгийн даргыг Монгол Улсад ойрын хугацаанд айлчлуулах талаар санал солилцож, Соёл, спорт, аялал жуулчлал, залуучуудын асуудал эрхэлсэн сайдтай нь уулзалт хийхээр урьдчилан тохиролцсон байна.

ДАЖБ-тай цаашдын хамтын ажиллагааны хүрээнд:

• Аялал жуулчлалын салбарт хөрөнгө оруулалт татах,

• Дэд бүтцийн хөгжлийг дэмжих,

• Мэргэжлийн зөвлөмж авах чиглэлээр хамтрах,

• Олон улсын хурал, чуулганы үеэр Монголын аялал жуулчлалыг сурталчлах арга хэмжээ зохион байгуулахаар боллоо.

Мөн тавдугаар сард Монгол Улс ДАЖБ-тай хамтран Ази, Номхон далайн бүсийн Аялал жуулчлалын гүйцэтгэх удирдлагын хөтөлбөрийг Улаанбаатар хотод зохион байгуулахаар төлөвлөсөн бөгөөд тус арга хэмжээнд бүс нутгийн хорин гаруй орны төлөөлөгч оролцохоор байна.

Энэ хүрээнд соёл болон тогтвортой аялал жуулчлалыг хөгжүүлэх, өнөөгийн чиг хандлага, бодлого, стратегийн талаар хэлэлцэх, мэдлэг солилцох өргөн боломж нээгдэж байгааг Гадаад харилцааны яам мэдээлжээ.

Эх сурвалж: Гадаад харилцааны яам