2026 онд Орон нутгийн хөгжлийн сан (ОНХС)-гаар хэрэгжүүлэх төсөл, арга хэмжээг тодорхойлохоор нийслэлийн есөн дүүргийн 204 хорооны иргэдээс санал авч эхэллээ. Иргэдийн саналыг 2025 оны зургадугаар сарын 15-ны өдрийг хүртэл хүлээн авах бөгөөд “ОНХС” гар утасны аппликейшн, “E-Mongolia” аппликейшн, мөн https://onhs.mof.gov.mn цахим хуудсаар дамжуулан санал өгөх боломжтой.

2025 онд нийслэлд нийт 60.3 тэрбум төгрөгийн санхүүжилт хуваарилагдаж, үүний 60 хувь буюу 36.2 тэрбум төгрөгийг дүүргүүдийн төсөлд зарцуулах бол үлдсэн 40 хувь нь нийслэлийн төвлөрсөн хөрөнгө оруулалтад төлөвлөгдсөн байна. Ийнхүү иргэдийн саналаар орон нутагт хэрэгжүүлэх төсөл, хөтөлбөрүүдийг тодорхойлж, амьдрах орчныг сайжруулж, тохижилт, боловсрол, эрүүл мэндийн чиглэлд бодит хөрөнгө оруулалт хийх боломж бүрддэг.

2024 онд иргэдийн оролцоотойгоор зохион байгуулагдсан санал асуулгад 204 хорооны 18-аас дээш насны иргэдийн 40 хувь оролцсон бөгөөд тэдний өгсөн саналаар 2025 оны төсөл, арга хэмжээнүүдийг баталсан. Үүний хүрээнд нийслэлд 24.1 тэрбум төгрөгийн төсвөөр сургууль, цэцэрлэг, эмнэлгийн барилга, их засварын ажлыг хэрэгжүүлж байгаа юм.

ОНХС нь иргэдийн оролцоонд тулгуурласан төсвийн төлөвлөлтөөс эхлэн хэрэгжилт, худалдан авалт, хяналт шинжилгээ, үнэлгээ зэрэг тав үндсэн үе шаттай. Иргэд эдгээр бүх үе шатанд оролцож, өөрийн амьдран буй орчны хөгжилд хувь нэмрээ оруулах боломжтой.

Тус сангийн эх үүсвэр нь нэмэгдсэн өртгийн албан татвар, газрын тос болон ашигт малтмалын нөөц ашигласны төлбөр, тусгай зөвшөөрлийн орлого зэргээс бүрддэг.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс