Монгол Улсын Их Хурлын дэд дарга Б.Пүрэвдорж тэргүүтэй парламентын төлөөлөгчид 2025 оны дөрөвдүгээр сарын 28, 29-нд ОХУ-ын Волгоград хотноо зохион байгуулагдсан “Аугаа их өв – хамтын ирээдүй” олон улсын чуулга уулзалтад оролцлоо. Энэхүү арга хэмжээ нь Аугаа их эх орны дайны ялалтын 80 жилийн ойг угтсан олон улсын хэмжээний арга хэмжээ байв.

Чуулганд Тусгаар улсуудын хамтын нөхөрлөлийн гишүүн орнууд, Европ, Ази, Латин Америкийн найрсаг орны парламентын төлөөлөгчид, түүхч, судлаачид оролцсон бөгөөд өргөтгөсөн хуралдааныг ОХУ-ын Холбооны Хурлын Төрийн Думын дарга Вячеслав Володин нээж, Сталинградын тулалдаан дэлхийн хоёрдугаар дайны хувь заяаг эргүүлсэн түүхэн үйл явдал болохыг онцлон тэмдэглэжээ. Мөн тэрбээр дайны жилүүдэд Монголын ард түмнээс үзүүлсэн тусламжийг үнэлж, талархал илэрхийлсэн юм.

Монгол Улсын Их Хурлын дэд дарга Б.Пүрэвдорж өргөтгөсөн хуралдаанд үг хэлэхдээ, 1941 онд дайн эхлэхтэй зэрэгцэн Бүгд Найрамдах Монгол Ард Улс ЗХУ-ыг дэмжиж, “Бүхнийг фронтод”, “Бүхнийг ялалтын төлөө” уриан дор өргөн хэмжээний тусламж илгээж байсныг дурдав. Монголчуудын илгээсэн 517 мянган агт морь, хүнс, дулаан хувцас болон бусад тусламжийг онцолж, Сталинградын тулалдаанд монгол агт морь унасан улаан армийн цэргүүдийн гүйцэтгэсэн үүрэг түүхийн үнэ цэнийг илтгэж байгааг онцлон тэмдэглэсэн байна.

Мөн тэрбээр Монголын ард түмний энэхүү үнэтэй дэмжлэгийн үр дүнд ЗХУ Монголын тусгаар тогтнолыг баталгаажуулахад дэмжлэг үзүүлж, улмаар Монгол Улс 1961 онд НҮБ-ын гишүүн болсон талаар дурсжээ. Тэрбээр “Өвөг дээдсийн маань ‘Аугаа их өв’, өнөөдрийн харилцан итгэлцэл, бидний хойч үеийн ‘Хамтын ирээдүй’ нь мөнхийн хоёр хөршийн эрх тэгш, гүн бат найрамдал мөнхжин орших болтугай” хэмээн онцолсон байна.

Чуулганы хүрээнд монголын парламентын төлөөлөгчид “Сталинградын тулалдааны баатрууд” түүх-дурсгалын цогцолборт очиж, мөнхийн галд цэцэг өргөсөн байна.

Чуулга уулзалтын хаалтын үйл ажиллагаанд ОХУ-ын Ерөнхийлөгч Владимир Путин, Беларусийн Ерөнхийлөгч Александр Лукашенко нар оролцож, зочид төлөөлөгчдөд хандан үг хэлсэн. Ерөнхийлөгч Путин Түүхэн дурсамжийг хамгаалах байнгын хороог Беларусь-Оросын Холбооны Парламентын Ассамблейн дэргэд байгуулах санал гаргажээ.

Эх сурвалж: Улсын Их Хурлын Хэвлэл мэдээллийн газар