Нийслэлийн Өмч хувьчлах комисс энэ сарын 15-нд хуралдаж, НЗД-ын дэргэдэх “Уламжлалт анагаах ухааны элэг судлалын клиник төв”-ийг менежментийн гэрээгээр ажиллуулах тухай 73 дугаар тогтоолыг хүчингүй болголоо. Үүний үр дүнд тус төвийн харьяа “Богд уул” сувиллыг хууль бусаар ашиглаж байсан үйл ажиллагааг таслан зогсоож, нийслэлийн өмчлөлд буцаан авсан байна.
Энэхүү сувилал нь “Уламжлалт анагаах ухааны элэг судлалын клиник төв”-ийн харьяа найман объектын нэг бөгөөд 2014 оноос хойш иргэн Ж.Хатанбаатар тус объектод хууль бусаар үйл ажиллагаа явуулж иржээ. Тус төвийг менежментээр ажиллуулах гэрээг анх 2008 онд Ж.Хатанбаатар, Ж.Адъяахүү, С.Оюунцэцэг нарын багтай байгуулсан бөгөөд 2011–2014 онд хийсэн аудитын шалгалтаар тус баг гэрээний үүргээ хангалтгүй биелүүлсэн нь тогтоогдож, 2014 оны гуравдугаар сард гэрээг хаахаар шийдвэрлэсэн байдаг.
Гэвч энэхүү шийдвэрийн дараа ч тэд үйл ажиллагаагаа үргэлжлүүлж, нийслэлийн өмчийг 10 гаруй жилийн хугацаанд хууль бусаар ашигласан нь тодорхой болжээ. Сувиллыг ашигласны төлөө ямар ч төлбөр төлөөгүй, зөвшөөрөлгүй орлого олж байсан бөгөөд 2004 онд хийсэн их засварын ажлыг 2009 онд 2.8 тэрбумаар үнэлүүлсэн ч өнөөдрийн байдлаар барилгын байдал доройтсон, арчлалт үйлчилгээ хангалтгүй байна.
Энэ талаар НЗДТГ-ын дарга Д.Амгалан “Зайсан дахь уг сувилал нь 1959 оноос ашиглагдаж эхэлсэн бөгөөд 39 га газрын хамт нийслэлийн өмчид бүртгэлтэй. Цаашид тус сувиллыг их засварт оруулж, үйл ажиллагааг хэвийн болгоход анхаарна” гэж мэдэгдэв.
Эх сурвалж: НЗДТГ
