Улаанбаатар хотод 2025-2028 онд хэрэгжүүлэх 24 мега төслийн хүрээнд Хүннү хот болон Багахангай-Хүннү хот чиглэлийн салбар төмөр замын төсөл багтжээ. Багахангай өртөөнөөс салаалж, Хүннү хот, Шувуун фабрик чиглэлд үргэлжлэх энэхүү төмөр зам 102.5 км урттай байх бөгөөд жилд 3.5-20 сая тонн ачааг Улаанбаатар хотоор дайруулахгүйгээр логистикийн төв рүү тээвэрлэх боломжтой болох юм.

Уг төсөл нь Улаанбаатар хотын төвлөрлийг сааруулах, замын хөдөлгөөний ачааллыг бууруулах, мөн Хүннү хотын шинэ суурьшлын бүсийн хөгжилд бодитой хувь нэмэр оруулах зорилготой. Хүннү хотыг төрийн захиргаа, их дээд сургууль, тээвэр логистик, аялал жуулчлал, санхүүгийн төрөлжсөн дагуул хот болгон хөгжүүлэхээр төлөвлөж байгаа юм.

Энэ хүрээнд хотын дарга Х.Нямбаатар тээвэр логистикийн чиглэлээр үйл ажиллагаа явуулдаг аж ахуйн нэгжүүдтэй уулзалт зохион байгуулж, Хүннү хотын тээвэр, логистикийн бүсийн хөгжлийн бодлогыг тодорхойлох, төр-хувийн хэвшлийн хамтын ажиллагааг бэхжүүлэх талаар санал солилцохоор төлөвлөжээ.

Эх сурвалж: Нийслэлийн Засаг даргын Тамгын газар