Монгол Улсын Засгийн газрын тэргүүлэх чиглэлийн нэг болох Эрчим хүчний реформын хүрээнд "Сэргээгдэх эрчим хүч ба тархмал эх үүсвэрийг хөгжүүлэх" ажлыг эрчимжүүлж байна. Засгийн газрын 2024-2028 оны үйл ажиллагааны хөтөлбөрт багтсан 14 мега төслийн нэгээр нийт 300 МВт хүртэлх салхины, 200 МВт хүртэлх нарны цахилгаан станцын төслүүдийг хэрэгжүүлэхээр төлөвлөжээ.

Эрчим хүчний сайдын тушаалаар байгуулагдсан ажлын хэсэг Баруун, Зүүн, Төвийн бүсийн орон нутгийн удирдлагуудтай хамтран тухайн төслүүдийг хэрэгжүүлэх газрыг улсын тусгай хэрэгцээнд авахаар шийдвэрлэсэн байна. Үүнд:

• Увс аймгийн Өмнөговь суманд 20 МВт-ын нарны цахилгаан станц (15 МВт/60 МВт.ц-ын батарей хуримтлуурын системтэй),

• Баян-Өлгий аймгийн Өлгийд 20 МВт-ын нарны цахилгаан станц,

• Хэнтий аймгийн Өндөрхаанд 15 МВт-ын нарны цахилгаан станц,

• Сүхбаатар аймгийн Баруун-Уртад 10 МВт-ын нарны цахилгаан станц,

• Дорнод аймгийн Тамсагт 20 МВт-ын нарны цахилгаан станц,

• Баянхонгор аймагт 10 МВт-ын нарны цахилгаан станц байгуулахаар төлөвлөсөн байна.

Төслүүдийг төсөл сонгон шалгаруулалтын зарчмаар хэрэгжүүлж, ашиглалтад оруулна. Засгийн газар, Эрчим хүчний реформын үндэсний хорооноос шинэ эх үүсвэрийн төслүүдийг хэрэгжүүлэхдээ хэрэглэгчийн цахилгаан эрчим хүчний дундаж тарифыг нэмэгдүүлэхгүй байх зарчмыг баримталж, хөрөнгө оруулалтыг олон улсын болон төр-хувийн хэвшлийн түншлэлээр шийдвэрлэхээр төлөвлөж байгааг мэдээллээ.

Эх сурвалж: Эрчим хүчний реформын үндэсний хороо