Хойд Солонгосын төрийн мэдлийн KCNA агентлагийн мэдээлснээр, Пёньяны армийн албан ёсны төлөөлөгчид анх удаа өөрсдийн цэргүүдийг Оросын талд байлдаанд оролцуулсан гэдгийг баталжээ. Уг мэдэгдэлд дурдсанаар, тэд удирдагч Ким Жон Уны тушаалаар Оросын Курск мужийг "бүрэн чөлөөлөх" ажиллагаанд оролцсон байна.

Энэ мэдээлэл нь Оросын Зэвсэгт хүчний штабын дарга Валерий Герасимов Курск дахь эсрэг давшилтын үеэр Хойд Солонгосын цэргүүдийн "баатарлаг"-ийг сайшаасан мэдэгдэл хийсний хэдхэн хоногийн дараа гарч байгаа бөгөөд энэ нь Москвагийн зүгээс тэдний оролцоог анх удаа олон нийтэд хүлээн зөвшөөрсөн явдал болж байна.

Гэсэн хэдий ч Москва Курскийн баруун хэсгийг бүрэн хяналтдаа авсан гэж мэдэгдсэн нь Украин талаас эрс үгүйсгэгдсэн байна.

Өмнөд Солонгос болон Барууны тагнуулын байгууллагууд өнгөрсөн жил Хойд Солонгос Курск руу хэдэн мянган цэрэг илгээсэн талаар мэдээлж байсан. KCNA агентлагийн тайлбарласнаар, цэргүүдийг илгээх шийдвэрийг Пёньян болон Москвагийн хооронд байгуулсан харилцан хамгаалалтын гэрээний хүрээнд гаргажээ.

Ким Жон Ун "Эх орныхоо нэр төрийг төлөөлөн шударга ёсны төлөө тэмцсэн бүх хүн бол баатрууд" хэмээн мэдэгдсэн талаар KCNA уламжилжээ. Мөн тэрбээр Курск муж дахь үйл явдлыг "цусны холбоогоор баталгаажсан найрамдал" гэж тодорхойлон, энэ нь хоёр улсын харилцааг бүх талаар гүнзгийрүүлэхэд чухал хувь нэмэр оруулна гэдгийг онцолжээ.

Харин Курск дахь үүргээ дуусгасны дараа Хойд Солонгосын цэргүүдийн ирээдүй хэрхэх талаар тодорхой мэдээлэл өгөөгүй байна.

Хойд Солонгосын цэргүүдийг илгээсэн талаарх анхны мэдээлэл өнгөрсөн аравдугаар сард, Ким Жон Ун болон Владимир Путин нарын харилцаа улам нягтарсны дараахан гарч байсан. Тухайн үед хоёр тал харилцан "довтолгоонд өртвөл туслалцаа үзүүлэх" тухай гэрээнд гарын үсэг зурсан юм.

Барууны албаныхны үзэж байгаагаар, Хойд Солонгосоос илгээсэн 11,000 орчим цэргийн дор хаяж 1,000 хүн гуравхан сарын хугацаанд амь үрэгдсэн байна. Хойд Солонгосын цэргүүд ихэвчлэн “Штурмын корпус” хэмээх "элит" ангиас бүрдсэн боловч орчин үеийн байлдааны нөхцөлд бэлтгэл хангалтгүй байсан гэж үзэж байна.

Британийн хуучин хуягт танкийн командлагч, хурандаа Хамиш де Бреттон-Гордон:

"Эдгээр нь үндсэн бэлтгэлтэй төдий цэргүүд бөгөөд тэднийг удирдаж буй орос офицеруудтай хэл, тактикийн хувьд ойлголцохгүй байна" гэж онцолжээ.

Гэсэн хэдий ч Украины Зэвсэгт хүчний командлагч генерал Александр Сырский өмнө нь Хойд Солонгосын цэргүүд Украины фронтод томоохон сорилт үүсгэж буйг анхааруулсан юм.

Тэрбээр Украины TSN Tyzhden мэдээллийн хөтөлбөрт өгсөн ярилцлагадаа:

"Эдгээр нь олон тооны, өндөр урам зоригтой, сайн бэлтгэгдсэн цэргүүд бөгөөд довтолгооны ажиллагаа идэвхтэй явуулж байна. Тэд Зөвлөлтийн үеийн тактикийн дагуу үйлдэл хийж байгаа. Тооны хүчээ ашиглаж байна" хэмээн тэмдэглэжээ.

Эх сурвалж: BBC News