Монгол Улсын Ерөнхийлөгчийн санаачилсан “Цагаан алт” үндэсний хөдөлгөөний хүрээнд олон улсын байгууллагуудтай хамтран ажиллах, санал солилцох уулзалт Гадаад харилцааны яаманд /2025.04.24/ болж өнгөрөв.

Ерөнхийлөгчийн Эдийн засгийн бодлогын зөвлөх Б.Даваадалай:

-“Цагаан алт” үндэсний хөдөлгөөний алсын хараа, удирдлагын бүтэц, үйл ажиллагааны тэргүүлэх чиглэлүүдийн талаар танилцууллаа. Тэрбээр танилцуулгадаа, өнгөрсөн оны 6 дугаар сард "Малын гаралтай түүхий эдийг боловсруулах үйлдвэрлэлийг дэмжих зарим арга хэмжээний тухай" 63 дугаар тогтоолыг УИХ-аас баталсан. Уг тогтоолын хүрээнд нэгдүгээрт хөдөө аж ахуй, хөнгөн үйлдвэрийн салбарын хууль, эрх зүйн орчныг шинэчлэх, хоёрдугаарт түүхий эдийн чанар, бэлтгэлийн тогтолцоог сайжруулах, гуравдугаарт экспортыг нэмэгдүүлж зах зээлийг тэлэх, дөрөвдүгээрт хүний нөөцийг бэлтгэн чадавхжуулах чиглэлээр ажиллаж байна.

Өнөөгийн нөхцөлд манай улсын нийт экспортын 90 хувийг уул уурхайн бүтээгдэхүүн эзэлж байгаа хэдий ч хөдөө аж ахуйн салбар хамгийн олон ажлын байрыг бий болгодог, орон нутгийн хөгжилд түлхэц үзүүлдэг салбар хэвээр байна. Иймд Монгол Улс цаашид уул уурхайн бус салбарыг хөгжүүлж, эдийн засгаа солонгоруулах хүрээнд тус хөдөлгөөнийг хэрэгжүүлж байна. Хөтөлбөрийн хүрээнд Элчин сайдын яамд, олон улсын байгууллагуудтай нягт хамтран ажиллах ба хууль эрх зүйн шинэчлэл, экспортын гарцыг нэмэгдүүлэх, хүний нөөцийг бэлтгэх тал дээр хамтрах бололцоотой. Үүний зэрэгцээ оролцогч талууд уур амьсгалын өөрчлөлтөд дасан зохицсон хөдөө аж ахуй, тогтвортой хөгжлийг бүрдүүлэх, ядуурлыг бууруулах дэлхий нийтийн хүчин чармайлттай “Цагаан алт” үндэсний хөдөлгөөнийг уялдуулж ажиллавал илүү үр дүнтэй байх болно гэв.

НҮБ-ын Хөгжлийн хөтөлбөрийн Монгол дахь Суурин төлөөлөгч Матилда Димовска:

-Монгол Улсын Ерөнхийлөгчийн санаачилсан “Цагаан алт” үндэсний хөдөлгөөн нь монгол орны мал аж ахуйн салбарын шинэчлэлд чиглэсэн маш оновчтой санаачилга юм. Тус хөтөлбөрийг дэмжих чиглэлд НҮБ-ын Хөгжлийн хөтөлбөр нь Хүнс, хөдөө аж ахуй, хөнгөн үйлдвэрийн яамтай хамтран “Цагаан алт” хөдөлгөөнийг дэмжих платформыг байгуулан ажиллаж байна. Энэхүү хамтын ажиллагааны платформ нь төр, Засгийн газар, малчдын хоршоо, хувийн хэвшил, олон улсын хамтрагч байгууллага зэрэг олон талын оролцогчтой байх ба Монгол Улсын Ерөнхийлөгчийн дэвшүүлсэн санаачилгыг дэмжин ажиллаж байна. Өнөөдрийн уулзалтын үеэр бид нэгэн чухал илтгэлийг сонслоо. Үүнд, ноос ноолуур, арьс ширний салбарын нэмүү өртөг шингэсэн бүтээгдэхүүний үйлдвэрлэлийг дэмжих шаардлагатай гэсэн ойлголт, мэдээллийг авлаа. Энэ чиглэлд бид хамтарч ажиллах болно гэлээ.

“Цагаан алт” үндэсний хөдөлгөөн нь Монгол Улсын Ерөнхийлөгчийн санаачилгаар ноос, ноолуур, арьс ширний салбарын хөгжлийг дэмжих, хөдөөгийн эдийн засгийг тэлэх, малчдын амьжиргааг дээшлүүлэх, нэмүү өртөг шингэсэн эцсийн бүтээгдэхүүн үйлдвэрлэлээр экспортын орлогыг нэмэгдүүлэхэд чиглэсэн цогц арга хэмжээний хүрээнд хэрэгжиж байна.