Ази, Номхон далайн бүсийн “Аспак-2025” чуулга уулзалт энэ оны зургаадугаар сарын 12–16-нд Улаанбаатар хотноо зохион байгуулагдахаар болж, урьдчилсан судалгаагаар 60 орчим улсын 4000 орчим төлөөлөгч оролцохоор бүртгэгдээд байна. Уг арга хэмжээг Нийслэлийн Засаг даргын Тамгын газар (НЗДТГ) болон JCI Монгол байгууллага хамтран зохион байгуулж байгаа бөгөөд 2017 онд мөн Улаанбаатар хотод зохион байгуулагдах үеэр 51 улсын 3600 төлөөлөл оролцож байв.

“Аспак” чуулга уулзалт нь 1951 оноос хойш зохион байгуулагдаж ирсэн, тухайн бүс нутгийн JCI байгууллагуудын жилийн ажлаа дүгнэдэг, ирэх оны зорилтоо тодорхойлдог томоохон арга хэмжээ юм. Энэ удаагийн уулзалтад JCI олон улсын ерөнхийлөгч, дэд ерөнхийлөгч, сенаторууд, зөвлөхүүд зэрэг дэлхийн залуучуудын манлайлагчид оролцоно.

Чуулга уулзалттай холбоотой бэлтгэл ажлын хүрээнд НЗДТГ-ын санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр тэргүүтэй албаныхан JCI Монгол байгууллагын төлөөллийг хүлээн авч уулзан санал солилцжээ. Уулзалтын үеэр Л.Хосбаяр “Дэлхийн залуучуудын чуулга уулзалтыг нийслэл Улаанбаатарт зохион байгуулах нь Монгол Улсыг олон улсад сурталчлах, аялал жуулчлал, эдийн засгийн идэвхийг нэмэгдүүлэх, залуучуудад урам зориг, манлайллын үнэт туршлага өгөх боломж юм” хэмээн онцолж, тус арга хэмжээг бүх талаар дэмжихээ илэрхийлсэн байна.

JCI Монгол байгууллага нь 1992 онд байгуулагдсан бөгөөд 2015 оноос хойш НЗДТГ-тай тогтмол хамтран ажиллаж, олон улсын чуулга уулзалтуудыг амжилттай зохион байгуулсаар иржээ.

Эх сурвалж: Нийслэлийн Засаг даргын Тамгын газар, JCI Монгол.