Монгол Улсын Ерөнхий сайдын дэргэдэх “Эдийн засгийн хөгжлийн зөвлөл” буюу Economic Development Board-ийн дөрөвдүгээр хуралдаан энэ сарын 21-нд зохион байгуулагдав. Хуралдааны хүрээнд дэлхийн эдийн засгийн тодорхой бус байдал, Монгол Улсын эрсдэлийн үнэлгээ, хууль эрх зүйн шинэчлэл, хувийн хэвшлийн санал зэргийг хэлэлцэж, төр, хувийн хэвшлийн хамтын ажиллагааны чиглэлийг тодорхойлов.

Хуралдааны эхэнд Тэргүүн Шадар сайд Л.Гантөмөр дэлхийн эдийн засгийн нөхцөл байдлын талаар зөвлөлийн гишүүдэд мэдээлэл хүргэсэн. Түүний тэмдэглэснээр, дэлхийн тодорхой бус байдлын индекс 2020 онд цар тахлын улмаас 56-д хүрч байсан бол 2024 онд АНУ-ын сонгууль, геополитикийн эрсдэлтэй холбоотойгоор 53 болжээ. Энэ нь манай улсын уул уурхайд суурилсан эдийн засагт сөрөг нөлөө үзүүлж буйг онцлов.

Азийн хөгжлийн банкны тооцооллоор:

• Дэлхийн эдийн засгийн өсөлт 2025 онд 0.4%, 2026 онд -0.7% агших төлөвтэй

• БНХАУ-ын өсөлт 2025 онд 0.4%, 2026 онд 0.9%-аар буурах хандлагатай

Иймд эдийн засгийн тогтвортой байдлыг хангах зорилгоор:

• Уул уурхайн биржийн тухай хуульд нэмэлт өөрчлөлт

• “Алт” хөтөлбөрийг хэрэгжүүлэх

• Хөгжлийн банкийг экзим банк болгох

• Төр, хувийн хэвшлийн түншлэлийн хуулийн шинэчлэл зэрэг арга хэмжээ шаардлагатайг танилцуулсан байна.

Хуралдаанд Эрчим хүчний дэд зөвлөлийн гишүүн Б.Баатармөнх Эрчим хүчний болон Сэргээгдэх эрчим хүчний тухай хуульд нэмэлт, өөрчлөлт оруулах санал танилцуулсан бөгөөд:

• Шинэ төслийн сонгон шалгаруулалтын журам шинэчлэх

• Олон улсын жишигт нийцсэн нэг цонхны үйлчилгээ нэвтрүүлэх

• Сэргээгдэх эрчим хүчний хэрэглэгчийн ангилал, гэрчилгээжүүлэлтийн тогтолцоо бий болгох

• Тогтвортой байдлын гэрээ байгуулалт, своп хэлцэл ашиглах эрх зүйн зохицуулалт хийх зэрэг 12 санал дэвшүүлжээ

Энэ хүрээнд МҮХАҮТ болон бизнесийн зөвлөлийн зүгээс 270 гаруй санал ирүүлснийг нэгтгэсэн байна.

Харин Ерөнхий сайд У.Хүрэлсүх эдийн засгийн эрх зүйн орчныг уялдуулах, хувийн хэвшлийн оролцоог хангах, томоохон төслүүдэд дэмжлэг үзүүлэх механизмыг бүрдүүлэхийг үүрэг болгож, “Алсын хараа-2050” хөтөлбөрт туссан Евразийн эдийн засгийн холбоотой түр хэлэлцээр байгуулах асуудал дээр анхаарахыг онцоллоо. Тэрээр “цаг үеийн сорилтыг давахын тулд цар тахлын үеийнхтэй дүйцэхүйц оновчтой, уялдаа холбоотой арга хэмжээг төр, хувийн хэвшил хамтран хэрэгжүүлэх шаардлагатай” гэдгийг онцлон тэмдэглэсэн юм.

Эх сурвалж: ЗГХЭГ, Сангийн яам, МҮХАҮТ.