Израилын Засгийн газар Францын зүүний 27 улстөрч, албаны хүмүүсийн визийг айлчлалаас нь хоёр хоногийн өмнө цуцалсан тухай France24 агентлаг мэдээллээ. Тэд Иерусалим дахь Францын консулын урилгаар Израил болон Палестинд тав хоногийн айлчлал хийхээр төлөвлөж байсан бөгөөд энэхүү шийдвэр нь сүүлийн өдрүүдэд улам хурцдаж буй дипломат зөрчлийг илтгэж байна.
Израилын Дотоод хэргийн яамны тайлбарласнаар, “улсын эсрэг үйл ажиллагаа явуулж болзошгүй” гэж үзсэн хүмүүсийн визийг цуцлахыг зөвшөөрсөн хуулийн хүрээнд уг шийдвэрийг гаргасан аж. Үүний өмнө Их Британийн Лейборист намын хоёр гишүүнийг ч Израилд нэвтрэхийг хориглосон нь анхаарал татсан үйл явдлын нэг байв.
Францын Ерөнхийлөгч Эммануэль Макрон Палестин улсыг хүлээн зөвшөөрөхөд ойрхон байгаагаа илэрхийлснээс хойш Израилтай дипломат зөрчил үүсээд буй. Израилын Ерөнхий сайд Беньямин Нетаньяху үүнийг “терроризмыг өдөөсөн алхам” хэмээн буруушаасан байна.
Визээ цуцлуулсан төлөөлөгчдийн бүрэлдэхүүнд Экологийн нам болон Коммунист намын гишүүд болох Франсуа Руффин, Алексис Корбьер, Жюли Озенне, Сумья Буруаха, Мариан Маргейт зэрэг депутатууд, хотын дарга нар, орон нутгийн хууль тогтоогчид орсон байна. Тэд “олон улсын хамтын ажиллагаа, соёлыг бэхжүүлэх” зорилгоор айлчлахаар төлөвлөж байсан бөгөөд уг шийдвэрийг “шийтгэл” хэмээн нэрлэж, Францын төр засгаас дэмжлэг хүсчээ.
Эх сурвалж: France24
