Улсын хүүхэд, залуучуудын театрын уран бүтээлчид энэ хавар Английн алдарт зохиолч Уильям Шекспирийн “Ромео Жульетта” сонгодог драмын жүжгийг дахин тайзнаа амилуулах гэж байна. Энэхүү жүжгийг тавдугаар сарын 9-нөөс эхлэн УХЗТ-ын тайзнаа тоглох бөгөөд уран бүтээлийн багт шилдэг уран бүтээлчид багтжээ.

Ерөнхий найруулагчаар Б.Энхээ, зураачаар Г.Ганбаатар, продюсероор гавьяат жүжигчин Н.Ариунболд, уран сайхны удирдагчаар Ардын багш Н.Ганхуяг ажиллаж байна. Дурлалт хосуудын дүрийг залуу жүжигчид Б.Түвшинбаяр (Ромео), М.Батгэрэл (Жульетта) нар бүтээж, Төрийн соёрхолт Ц.Төмөрбаатар, гавьяат жүжигчин Б.Нармандах, соёлын тэргүүний ажилтан Ж.Даваасамбуу нар ч мөн тус бүтээлд дүр бүтээж оролцох нь онцлог юм.

Энэ бүтээл нь 1966 онд Улсын Хүүхэд, залуучуудын театрт “Ромео Жульетта хоёр” нэртэйгээр анх тоглогдож байсан бөгөөд найруулагчаар С.Гэндэн, Ромеогийн дүрд жүжигчин У.Готов, Жульеттад Б.Энхтуяа тоглож байжээ. Түүнээс хойш 30 жилийн дараа буюу 1996 онд УДЭТ анх удаа энэ сонгодог жүжгийг тайзнаа тавьж, найруулагчаар урлагийн гавьяат зүтгэлтэн Ч.Найдандорж, гол дүрд О.Гэрэлсүх, И.Одончимэг нар тоглосон юм.

2012 онд “Сонгодог мюзикл продакшн” Монгол-Францын соёлын төвтэй хамтран “Ромео, Жульета” дуурийг эх хэлээрээ анх удаа тавьж байсан бол 2015 онд УДЭТ үзвэрийн 85 жилийн ойн нээлтээ мөн энэ жүжгээр хийсэн. Тухайн бүтээлийг Төрийн соёрхолт найруулагч Н.Наранбаатар найруулж, орчуулгыг МҮОНТ-ийн нэрт кино орчуулагч Х.Мэргэний бүтээлээр үзэгчдэд хүргэсэн байдаг.

Мөн 2022 онд “Ромео Жульетта хоёр” номыг орчуулагч Х.Мэргэний орчуулгаар дахин хэвлэж, сонгодог утга зохиолыг монгол уншигчдын гарт хүргэсээр байна.

Эх сурвалж: Улсын Хүүхэд, залуучуудын театр, УДЭТ, Монгол-Францын соёлын төв