Монгол Улсын Ерөнхийлөгч У.Хүрэлсүх “Цагаан алт” үндэсний хөтөлбөрийн хэрэгжилтийн хүрээнд гутал үйлдвэрлэгч үндэсний компаниудад ажиллалаа. Тэрбээр Баянзүрх дүүргийн 31-р хороонд байрлах “Миний гутал” ХХК-д зочилж, тус компанийн үйл ажиллагаатай танилцсан байна.

“Миний гутал” ХХК нь анх 2011 онд гутал засвараар эхэлж байсан бол өнөөдөр “Yurdi” брэндийн өдөрт 200 хос гутал үйлдвэрлэх хүчин чадалтай болжээ. Тус компани өнгөрсөн онд 42 мянган хос гутал үйлдвэрлэж, 21 аймагт борлуулалтын гэрээ байгуулсан байна. “Цагаан алт” хөтөлбөрийн хүрээнд 600 сая төгрөгийн эргэлтийн хөрөнгийн зээл авч, үйлдвэрлэлээ өргөтгөн, 2027 оноос өдөрт 400 хос гутал үйлдвэрлэх, 30 ажлын байр шинээр бий болгохоор төлөвлөж байна.

Мөн Ерөнхийлөгч “Өндөр уртын буян” ХХК-ийн үйл ажиллагаатай танилцлаа. Тус компани нь 45 ажилтантай бөгөөд хөрөнгө оруулалтын зээлээр улсын анхны шууд уллагааны үйлдвэрийг байгуулсан. Өдөрт “Батур” брэндийн 800 хос ажлын гутал үйлдвэрлэж буй тус компани “Цагаан алт” хөтөлбөрөөр эргэлтийн хөрөнгийн зээл авч, 2028 он гэхэд үйлдвэрлэлээ хоёр дахин өсгөх, өдөрт 1600 хос гутал үйлдвэрлэх зорилт тавьжээ.

Эдгээр үндэсний үйлдвэрлэгчид нь дотоодын боловсруулсан арьс, ширийг ашиглан эцсийн бүтээгдэхүүн үйлдвэрлэдэг бөгөөд зах зээлийн тодорхой хувийг хангаж, цаашлаад экспортод гаргах боломжтой аж. Компаниуд зээл, татварын бодлогоор илүү дэмжлэг авах, зээлийн эргэн төлөлтийн хугацааг сунгах, ажиллах хүчийг бэлтгэх чиглэлд төрөөс онцгой анхаарал хандуулах шаардлагатайг Ерөнхийлөгчид уламжилжээ.

Боловсролын сайд П.Наранбаярын мэдээлснээр, өнөөдөр МСҮТ-д суралцаж буй 40 мянга гаруй залуугаас гутал үйлдвэрлэлийн чиглэлээр ердөө 77 нь суралцдаг бөгөөд энэ салбарт “суралцангаа ажиллах, ажиллангаа суралцах” боломжийг нэмэгдүүлэх зорилготой хөтөлбөрүүдийг хэрэгжүүлэхээр төлөвлөж байна.

2025 онд “Цагаан алт” хөтөлбөрийн хүрээнд арилжааны 10 банкны оролцоотойгоор нийт 300 тэрбум төгрөгийн эргэлтийн хөрөнгийн зээл, 489 тэрбум төгрөгийн хөрөнгө оруулалтын зээл олгохоор төлөвлөсөн бөгөөд Засгийн газраас зээлийн хүүгийн хөнгөлөлтөд 66 тэрбум төгрөг зарцуулахаар болсон байна. Жилд нэг сая хос гутал үйлдвэрлэдэг үндэсний үйлдвэрлэгчдийн хүчин чадлыг 2028 он гэхэд хоёр сая хос хүргэх зорилт тавиад байна.

Эх сурвалж: Ерөнхийлөгчийн Тамгын газар, “Цагаан алт” хөтөлбөрийн хэрэгжилтийн ажлын хэсэг