"Хамгийн сайн халамж бол хөдөлмөр эрхлэлт" уриан дор Хөвсгөл аймагт хөгжлийн бэрхшээлтэй иргэдийн хөдөлмөр эрхлэлтийг дэмжих, бодит оролцоог хангах цогц арга хэмжээ үргэлжилж байна. Энэхүү ажлын хүрээнд хөгжлийн бэрхшээлтэй иргэд болон хөгжлийн бэрхшээлтэй хүүхдээ асран хамгаалж буй эцэг, эхчүүдийн эрхэлж буй жижиг бизнес, бүтээгдэхүүнийг олон нийтэд таниулах, төрийн үйлчилгээг нэг дороос хүргэх Ability Expo арга хэмжээг зохион байгууллаа.

Монгол Улсад 112 мянга орчим хөгжлийн бэрхшээлтэй хүн амьдардаг бөгөөд тэднийг зөвхөн халамж хүсэгч гэж харах нь өрөөсгөл ойлголт юм. Судалгаагаар гэр бүлд хөгжлийн бэрхшээлтэй хүн байхад эдийн засгийн нөхцөл байдал, амьдралын чанар дагаад буурдаг нь тогтоогдсон. Иймд тэдний хэрэгцээ, чадварт нийцсэн ажлын байр бий болгох нь нэн тэргүүний зорилт болоод байна.

Гэр бүл, хөдөлмөр, нийгмийн хамгааллын яамнаас хөгжлийн бэрхшээлтэй хүний үйлчилгээ авахад тулгарч буй саад бэрхшээлийг илрүүлж, оновчтой шийдлийг тодорхойлох, мөн тухайн хүний онцлогт нийцсэн үйлчилгээг хүргэх зорилго бүхий нийгмийн үйлчилгээний зураглал гаргах ажилд анхаарч буй. Цаашид уг зураглалыг үндэслэн хөгжлийн бэрхшээлтэй иргэдэд чиглэсэн хөгжлийн үйлчилгээг илүү хүртээмжтэй, нэгдсэн байдлаар хүргэх эрх зүйн орчныг бүрдүүлэхээр зорьж байна.

Тус арга хэмжээг ирэх хугацаанд зургаан аймагт бүсчилсэн байдлаар үргэлжлүүлэн зохион байгуулахаар төлөвлөжээ.

Эх сурвалж: Гэр бүл, хөдөлмөр, нийгмийн хамгааллын яам