Монгол Улсын Бүсчилсэн хөгжлийн бодлогын хүрээнд Соёл, спорт, аялал жуулчлал, залуучуудын хангайн бүсийн зөвлөгөөн өнөөдөр Өвөрхангай аймагт боллоо.  

Зөвлөгөөнд ССАЖЗ-ын сайд Ч.Номин тэргүүтэй яамны төлөөллүүд, Архангай, Баянхонгор аймгийн соёлын салбарын удирдлага, албан хаагчид оролцож, аялал жуулчлал, соёлын бүтээлч үйлдвэрлэлийг хөгжүүлэх чиглэлээр зөвлөлдсөн байна.

“Өвөрхангай аймаг нь соёлын өв, дурсгалт газрууд дээрээ түшиглэн аялал жуулчлал, соёлын бүтээлч үйлдвэрлэлээ хөгжүүлснээр орон нутгийн эдийн засгийг тэлэх, ажлын байрыг бий болгох, малчин өрх, хөдөө аж ахуй эрхлэгчдийн орлогыг нэмэгдүүлэх боломж нөөц ихтэй” гэдгийг Ч.Номин сайд онцолжээ.

Гэвч Хархорин, Хайрхандулаан, Хужирт, Өлзийт зэрэг улсын чанартай авто зам дагуу нутаг дэвсгэрт үйлчилгээний цогцолбор байгуулахаар төлөвлөсөн ч газар олголтын явц удаашралтай байгааг хэлж байв. Цаашид аялал жуулчлалыг аймаг дангаараа бус бүсийн хэмжээнд хөгжүүлэх нь чухал байгааг зөвлөгөөнөөр онцолж, Архангай, Баянхонгор, Өвөрхангай аймгийг холбосон аялал жуулчлалын алтан гурвалжин маршрутыг бий болгох санал гарсан юм.

Хангайн бүсийн хэмжээнд нийт 68 соёлын байгууллага, 12.859 түүх соёлын үл хөдлөх дурсгал, 997 дурсгалт газар байна. Хангайн бүсийн дотоодын нийт бүтээгдэхүүний салбаруудын бүтцийг авч үзвэл 16.7 хувь нь үйлдвэрлэл, 30.3 хувь нь үйлчилгээ, 51.8 хувь нь хөдөө аж ахуй, 1.2 хувь нь уул уурхайгаас бүрддэг.

Бүсийн эдийн засагт уул уурхайн салбар бага хувь эзэлж байгаа нь түүх, соёлын нөөцөд тулгуурласан аялал жуулчлал, тэр дундаа соёлын бүтээлч үйлдвэрлэлд тулгуурласан аялал жуулчлалыг хөгжүүлэх бүрэн боломж байгааг онцлон танилцууллаа.

Монгол улсын нийт хүн амын 29 хувь нь 15-34 насны залуус ба хангайн бүсийн 294863 иргэний 29.9 хувь нь залуучууд юм. Тиймээс залуучуудын тулгамдсан асуудлыг шийдвэрлэсэн, дэлхийд өрсөлдөх чадвартай залуу хүнийг төлөвшүүлэхэд чиглэсэн бодлогыг боловсруулж авч явна гэдгийг Ч.Номин сайд хэлж байна. Энэ хүрээнд 2026 оныг "Боловсролын жил" болгон зарлах аж.