Нийслэл Улаанбаатар хотын тулгамдсан асуудлуудыг шийдвэрлэх зорилготой Ерөнхий сайдын дэргэдэх Шуурхай штабын IX хуралдаан бямба гаригт болсон. Хуралдаанаар дөрвөн асуудлыг хэлэлцсэн байна.

Засгийн газар 2026 оныг “Боловсролын жил” болгон зарласан. Энэ хүрээнд боловсролын үйлчилгээний чанар, хүртээмж, багшлах боловсон хүчний хүрэлцээг нэмж, чадавхийг сайжруулах, сургалтын хөтөлбөрийг боловсронгуй болгох зэрэг олон асуудлыг шийдвэрлэх аж. Замын түгжрэлийн 54.7 хувь нь Ерөнхий боловсролын сургуулийн сурагчдын зорчих хөдөлгөөнөөс үүдэлтэй гэсэн судалгаа бий.

Тэгвэл нийслэлийн 150 сургуульд 307 мянган хүүхэд суралцдаг бөгөөд үүнээс өдөр бүр 168 мянган сурагч, 7844 багш дүүрэг хооронд зорчдог нь замын ачаалал нэмэгдэхэд нөлөөлдөг байна. Тиймээс ЕБС-ийн ачаалал, төвлөрлийг бууруулахын тулд хүн ам олонтой томоохон хотхон, хорооллууд дунд цэцэрлэг, бага сургууль барих концепцийг Боловсролын яам, НЗДТГ-аас танилцуулав. 2025 онд улсын төсвөөс 25, гэр хорооллын бүсэд 2026 онд 29, 2027 онд 28 сургууль барихаар төлөвлөжээ. Үр дүнд нь сургуулийн ачаалал буурна. Түүнчлэн сургалтын чанар, боловсон хүчний асуудалд давхар анхаарснаар сурагчдын дүүрэг хоорондын зорчилт, замын хөдөлгөөний ачааллыг ч бууруулна гэж үзжээ. Мөн 14 дагуул хот, нийслэлийн ерөнхий төлөвлөгөө 2040 зэрэгтэй уялдуулан их, дээд сургуулиудын байршил, замын түгжрэлд үзүүлж буй нөлөө зэргийг тооцож шинээр байршуулах шаардлагатайг албаыхан хэллээ. Хуралдааны үеэр Ерөнхий сайд Л.Оюун-Эрдэнэ “Боловсролын чанар, хүртээмжийн асуудлыг төвлөрлийг сааруулах, нийслэл Улаанбаатар хотын түгжрэлийг бууруулах бодлоготой уялдуулж шийдвэрлэнэ. Шуурхай штабын найман удаагийн хуралдаанаас нийслэлд хэрэгжүүлэх томоохон төслүүдийн эрэмбэ, дарааг тогтоож хөрөнгө оруулалт, санхүүжилтийн асуудлыг тодорхой болгосон зэргээр багагүй үр дүн гарлаа. Ерөнхий боловсролын сургуулиудын ачааллыг бууруулж хоёр, гурван ээлжээр хичээллэдэг байдлыг бүрэн халах, өнөөдрийн хэрэгцээ шаардлагыг ирээдүйн өсөлттэй хамтатган авч үзэж энэ салбарын бүтээн байгуулалт, хөрөнгө оруулалтын асуудлуудыг Засгийн газрын хуралдаанд нэгтгэн танилцуулаарай” хэмээн холбогдох албаныханд хэлэв.

Мөн Шуурхай штабын өнгөрсөн хуралдаануудаас нийслэлд хэрэгжүүлэх томоохон төслүүдийн эрэмбэ тогтоосон, хөрөнгө оруулалт, санхүүжилтийн асуудлыг тодорхой болгосон, Улаанбаатар хотын автозамын хөдөлгөөнийг нэгдсэн цахим хяналт, бүртгэлийн системд шилжүүлсэн, салбаруудын асуудлыг нэгтгэн харж, гарц шийдлийг олох зэрэг үр дүн байгаа ч хуралдаанаас гарсан үүрэг даалгаврыг шуурхай биелүүлэх, илүү бүтээлч, санаачилгатай ажиллах шаардлага байгааг зарим байгууллага, албан тушаалтанд сануулж цаашид хариуцлага тооцож ажиллахыг анхаарууллаа.