УИХ-ын Төрийн байгуулалтын байнгын хорооны дарга Ж.Бат-Эрдэнэ Европын аюулгүй байдал, хамтын ажиллагааны байгууллагын төлөөлөгч Ардчилсан институт хүний эрхийн алба /АИХЭА/-ны Хууль тогтоомжийн дэмжлэг үзүүлэх асуудал хариуцсан мэргэжилтэн Надия Сиренко, тус албаны Улс төрийн намуудын асуудлаарх үндсэн шинжээчдийн бүлгийн гишүүн Фернандо Касал Бертоаг баасан гарагт хүлээн авч уулзлаа.

Байнгын хорооны дарга Ж.Бат-Эрдэнэ уулзалтын үеэр улс төрийн намуудын үйл ажиллагааг сайжруулах нь улс орны тогтвортой байдал, ардчилал, хүний эрхийг хөгжүүлэхэд чухал нөлөөтэйг онцоллоо.

Ардчилсан институт хүний эрхийн албаны Хууль тогтоомжийн дэмжлэг үзүүлэх асуудал хариуцсан мэргэжилтэн Надия Сиренко, ЕАБХАБ нь гишүүн орнуудынхаа хууль олон улсын стандартад нийцэж буй эсэхэд үнэлгээ өгдгийг тодотгоод, Монгол Улсын Их Хурлын даргын хүсэлтээр Улс төрийн намын тухай хуулийн төсөлд Венецийн комисстой хамтран 2022 онд үнэлгээ өгсөн. Ингэхдээ тухай үеийн УИХ-ын гишүүдийн төлөөлөлтэй хэд хэдэн удаа цахимаар уулзсаныг дурдаад, СЕХ-ны хүсэлтээр дээрх хуульд үнэлгээ хийж байна гэлээ. Хуулийн төслийг батлахдаа тус байгууллагаас өгсөн зөвлөмжөөс тусгаж дэвшилттэй болсон ч сайжруулах зарим зүйл байгааг тодотгосон. Тэрбээр, Улс төрийн намын тухай хуульд үнэлгээ өгөхийн тулд СЕХ, Улсын дээд шүүх, АТГ, Улс төрийн намуудын төлөөлөлтэй уулзаж, мэдээлэл цуглуулж, үүнд үндэслэн эцсийн дүгнэлтээ гаргана гэв.

Төрийн байгуулалтын байнгын хорооны дарга Ж.Бат-Эрдэнэ, Улс төрийн намын тухай хуульд тодорхой өөрчлөлт оруулахыг дэмждэгээ илэрхийлж, тэр дундаа намын санхүүжилтийг тодорхой болгож, УИХ-ын сонгуулийн тухай хуульд өөрчлөлт оруулах шаардлагатайг тэмдэглэлээ.

Байнгын хорооны дарга улс төрийн сонгуульд оролцож буй нэр дэвшигчийн санхүүгийн байдал, сонгуулийн зардал, Улс төрийн намын тухай хуульд өөрчлөлт оруулах болсон шалтгааны талаар мэдээлэл өглөө. Тэрбээр сонгуульд нэр дэвшигчид тавих санхүүжилттэй холбоотой шаардлага ямар байвал зохих, улс төрийн намын санхүүжилтийн талаарх байр сууриа илэрхийлж харилцан санал солилцлоо. 

ЕАБХАБ-ын Ардчилсан институц, хүний эрхийн албыг 1991 онд байгуулсан бөгөөд гишүүн орнуудад болж буй сонгуулийн үйл ажиллагааг ажиглах, сонгуулийн болон хүний эрхийн байгууллагад техникийн тусламж үзүүлэх, зөвлөгөө өгөх, ТББ, иргэний нийгмийн хөгжлийг дэмжих, сургалт семинар зохион байгуулах зэргээр хүний эрхийг хамгаалах, яс үндэс, шашин шүтлэгээр нь ялгаварлан гадуурхах, үл тэвчих явдал, хүн худалдаалах гэмт хэрэгтэй тэмцэх, хууль сахиулах, ардчиллыг хөгжүүлэхэд чиглэсэн олон талт үйл ажиллагаа явуулдгийг УИХ-ын Хэвлэл мэдээллийн газраас мэдээллээ.